ବୌଦ୍ଧ: ଲୋକ ନୃତ୍ୟ ଓ ଲୋକ ବାଦ୍ୟରେ ଦୁଲୁକିଲା ବୌଦ୍ଧ ଜିଲ୍ଲା ମହୋତ୍ସବ । ଶେଷରେ ଲୋକ ନୃତ୍ୟରେ ବିହ୍ବଳ ହୋଇ ଜିଲ୍ଲାପାଳ ଓ ଏସପି ମଧ୍ୟ କଳାକାରଙ୍କ ସହ ତାଳରେ ତାଳ ମିଶାଇ ନାଚିଲେ ଢେମସା ।
ବୌଦ୍ଧର ଗୌତମ ବୁଦ୍ଧ ମଣ୍ଡପରେ ଚାଲିଥିବା ଜିଲ୍ଲା ଲୋକ ମହୋତ୍ସବର ଶନିବାର ତୃତୀୟ ସଂଧ୍ୟାରେ ଲୋକନୃତ୍ୟରେ ମଞ୍ଚ ଦୁଲୁକିଲା । ତୃତୀୟ ଦିବସର ମୁଖ୍ୟ ଅତିଥି ଭାବରେ ଶ୍ରମ ମନ୍ତ୍ରୀ ସୁଶାନ୍ତ ସିଂ ତଥା ସମ୍ମାନୀତ ଅତିଥି ରୂପେ ହାସ୍ୟ ଚଳଚ୍ଚିତ୍ର ଅଭିନେତା ଜୟୀରାମ ସାମଲ ,କଣ୍ଟାମାଳ ବ୍ଲକ ଅଧ୍ୟକ୍ଷା ଓ ବୌଦ୍ଧର ପୂର୍ବତନ ଜିଲ୍ଲାପାଳ ମଧୁସୂଦନ ମିଶ୍ର ପ୍ରମୁଖ ଯୋଗ ଦେଇଥିଲେ । ଜୟୀଙ୍କ ହାସ୍ୟ ସହିତ ମ୍ୟାଜିକ ସୋ ଦର୍ଶକଙ୍କୁ ବାନ୍ଧି ରଖିଥିଲା । କିନ୍ତୁ ମଞ୍ଚରେ ଓଡ଼ିଶାର ବିଭିନ୍ନ ସ୍ଥାନରୁ ଆସିଥିବା କଳାକାରଙ୍କ ଲୋକନୃତ୍ୟ ଅତ୍ୟନ୍ତ ଚିତ୍ତାକର୍ଷକ ଥିଲା ।
ଶେଷରେ ରାୟଗଡା କଳାକାରଙ୍କ ଦ୍ବାରା ପରିବେଷିତ ଢେମସା ନୃତ୍ୟର ଆକର୍ଷଣ ପ୍ରଶାସନିକ ଅଧିକାରୀଙ୍କୁ ରୋକିପାରିନଥିଲା । ମଞ୍ଚ ସମ୍ମୁଖରେ ଢେମସା ନୃତ୍ୟର ତାଳେ ତାଳେ କଳାକାରଙ୍କ ସହ ବୌଦ୍ଧ ଜିଲ୍ଲାପାଳ ଲଲାଟେନ୍ଦୁ ମିଶ୍ର, ଏସପି ଭି ରଘୁନାଥ ରାଓ ଓ ପିଡି ସୂର୍ଯ୍ୟ ନାରାୟଣ ଦାସ ତାଳରେ ତାଳ ମିଶାଇ ନାଚିଲେ । ବୌଦ୍ଧ ଜିଲ୍ଲାର କଳା,ସଂସ୍କୃତି ଓ ପରମ୍ପରାକୁ ସମସ୍ତ କଳାକାର ଓ ମନ୍ତ୍ରୀ ଭୁରି ଭୁରି ପ୍ରଶଂସା କରିଥିଲେ ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
