ବୌଦ୍ଧ : ଉଦବେଗ ଜନକ ସ୍ଥିତିରେ ଶିଶୁ ଶ୍ରମିକ ପ୍ରଥା । ଶିଶୁ ଶ୍ରମିକ ବିରୋଧରେ କଡା ଆଇନ ରହିଥିଲେ ମଧ୍ୟ ଅନେକ ସ୍ଥାନରେ ଏହାର ଖୋଲାଖୋଲି ଉଲଙ୍ଘନ କରାଯାଉଥିବା ଦେଖାଯାଉଛି । ବୌଦ୍ଧ ଜିଲ୍ଲାର ତିନୋଟି ବ୍ଲକର ବିଭିନ୍ନ ସ୍ଥାନରେ ନାବାଳକ ଓ ନାବାଳିକା ମାନଙ୍କୁ ସେମାନଙ୍କ ଅସହାୟତା ତଥା ଆର୍ଥିକ ସମସ୍ୟାକୁ ଆଳ କରି ସେମାନଙ୍କ ଦ୍ବାରା ବିଭିନ୍ନ କାର୍ଯ୍ୟ କରାଯାଉଛି ।
ବୌଦ୍ଧ ଜିଲ୍ଲାର ବିଭିନ୍ନ ଇଟା ଭାଟିରେ ଶିଶୁ ଶ୍ରମିକ ନିୟୋଜନ ଏକ ସାଧାରଣ କଥା ହୋଇଯାଇଛି । ଯେଉଁଠି ବେଆଇନ ଇଟା ଭାଟି ଖୁଲମଖୁଲା ଚାଲିଛି ସେଠାରେ ଏହି କାର୍ଯ୍ୟରେ ନିୟୋଜିତ ଶିଶୁ ଶ୍ରମିକଙ୍କ କଥା ପଚାରେ କିଏ । ବାଉଁଶୁଣୀ ଥାନା ଅଞ୍ଚଳରେ ଏଭଳି ଇଟା ବୋଝେଇ ଟ୍ରାକ୍ଟରରେ କାମ କରୁଥିବା ନାବାଳକଙ୍କ ଭାଇରାଲ ଭିଡିଓ ଏବେ ସବୁଆଡେ ଚର୍ଚ୍ଚାର ବିଷୟ ହୋଇଛି । ସେପଟେ ହରଭଙ୍ଗା ବ୍ଲକ ନିକଟସ୍ଥ କରଡାକୋଠା ପ୍ରାଥମିକ ବିଦ୍ୟାଳୟର ପାଚେରୀ ରଙ୍ଗ କାର୍ଯ୍ୟରେ ଦୁଇ ଜଣ ନାବାଳକ ନିୟୋଜିତ ଘଟଣା ଆମ ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ସେହିପରି ବିଭିନ୍ନ ବାଲି ବୋଝେଇ କାମ ଓ କେନ୍ଦୁପତ୍ର ଫଡିରେ ଶିଶୁ ମାନଙ୍କୁ କାମରେ ନିୟୋଜିତ ଅତ୍ୟନ୍ତ ଚତୁରତାର ସହ ସମ୍ପାଦନ କରାଯାଇଥାଏ । ବୁଦ୍ଧିଜୀବୀ ଏନେଇ ଗଭୀର ଉଦବେଗ ପ୍ରକାଶ କରିଥିବା ବେଳେ ଜିଲ୍ଲା ଶ୍ରମ ଅଧିକାରୀ ସୂଚନା ମିଳିଲେ ଦୃଢ କାର୍ଯ୍ୟାନୁଷ୍ଠାନ ହେବ ବୋଲି ସୂଚନା ଦେଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
