ବୌଦ୍ଧ: ଜିଲ୍ଲାରେ ଆସନ୍ତା ମେ ୨୭ତାରିଖରୁ ଆରମ୍ଭ ହେବ ରବିଧାନ ସଂଗ୍ରହ । ଶିଳ୍ପ ବିହୀନ ବୌଦ୍ଧ ଜିଲ୍ଲାର ଲୋକଙ୍କ ଆୟର ପ୍ରମୁଖ ମାଧ୍ୟମ ହେଲା ଧାନଚାଷ । ଏଣୁ ସେମାନେ ଉଭୟ ଖରିଫ ଓ ଡାଳୁଅ ଚାଷ କରି ଜିବୀକା ନିର୍ବାହ କରିଥାନ୍ତି । ଏହାକୁ ଲକ୍ଷ୍ୟରେ ରଖି ଜିଲ୍ଲା ପ୍ରଶାସନ, ଯୋଗାଣ ବିଭାଗ, କୃଷି ବିଭାଗ ,ମିଲର,ଚାଷୀ ସଂଗଠନ ଓ ଆର ଏମସିର ମିଳିତ ବୈଠକ ବୁଧବାର ଜିଲ୍ଲାପାଳଙ୍କ କାର୍ଯ୍ୟାଳୟରେ ଅନୁଷ୍ଠିତ ହୋଇଥିଲା । କିନ୍ତୁ ବୈଠକରେ କୃଷି ଅଧିକାରୀଙ୍କ ଦେଖା ମିଳିନଥିଲା ।
ଆଉ ଗୋଟିଏ ଦିନ ମଧ୍ୟରେ ବାତ୍ୟା 'ଫନି'ର କିଭଳି ବୌଦ୍ଧ ଜିଲ୍ଲାର ଚାଷ ଉପରେ ପଡିବ ଓ ପ୍ରଚଣ୍ଡ ଖରାରେ କିଭଳି ଚାଷୀଙ୍କୁ ସୁବିଧା ଯୋଗାଇ ରବିଧାନ ସଂଗ୍ରହ ହେବ ସେ ସମ୍ପର୍କରେ ବୈଠକରେ ଆଲୋଚନା ହୋଇଥିଲା ।
ଜିଲ୍ଲାପାଳ ସିତାଂଶୁ କୁମାର ରାଉତଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଗୁରୁତ୍ବପୂର୍ଣ୍ଣ ବୈଠକରେ ଉପଜିଲ୍ଲାପାଳ ଏନସି ଜ୍ୟୋତି ରଞ୍ଜନ ନାଏକ, ଯୋଗାଣ ଅଧିକାରୀ ବିଷ୍ଣୁ ଚରଣ ପ୍ରଧାନ ଓ ଅନ୍ୟାନ୍ୟ ଅଧିକାରୀ ଯୋଗ ଦେଇଥିଲେ ମଧ୍ୟ କୃଷି ଅଧିକାରୀ ବୈଠକକୁ ଆସିନଥିଲେ ।
ଅନ୍ୟ ପକ୍ଷରେ ଇଟିଭି ଭାରତ ଯେତେବେଳେ ଡାଳୁଅ ଚାଷକୁ ନେଇ ପ୍ରକୃତ ଚାଷୀଙ୍କ ପ୍ରତିକ୍ରିୟା ନେବାକୁ ପହଞ୍ଚି ଥିଲା ସେତେବେଳେ ଚିତ୍ର ପୂରା ଓଲଟା ଥିଲା । କାରଣ ଧାରବାଡି କରି ଡାଳୁଅ ଚାଷ କରି ରୋଗ ପ୍ରତିଷେଧକ ସିଞ୍ଚନ ପରେ ସମ୍ପୂର୍ଣ୍ଣ ଭାବେ ଧାନ ପୋଡିଯାଇଥିବା ଚାଷୀ ଅଭିଯୋଗ କରିଛନ୍ତି ।
ଏନେଇ ସେମାନେ ସିଧାସଳଖ କୃଷି ଅଧିକାରୀଙ୍କ ଆଡକୁ ଅଙ୍ଗୁଳି ନିର୍ଦ୍ଦେଶ କରିଛନ୍ତି । ସରକାରଙ୍କ ଏତେ ଯୋଜନା ସତ୍ତ୍ବେ ଜଣେ ଧାନଚାଷୀ ଅମଳ ହେଉ କିମ୍ବା ବୀମା ଯୋଜନାରୁ ବାଦ ପଡିବା ଭଳି ଘଟଣା ସାଧାରଣରେ ଆଶ୍ଚର୍ଯ୍ୟ ପ୍ରକାଶ ପାଇଛି । ଏଣୁ ଚଳିତ ବର୍ଷ ରବିଧାନ ସଂଗ୍ରହ ଲକ୍ଷ୍ୟ କିଭଳି ହେଉଛି ତା ଉପରେ ସମସ୍ତଙ୍କ ନଜର ରହିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
