ବୌଦ୍ଧ: ରକ୍ତ ଭଣ୍ଡାରରେ ମିଳୁନି ରକ୍ତ । ଜିଲ୍ଲାରେ ଥିବା ରକ୍ତହୀନତା ରୋଗର ଶିକାର ରୋଗୀ ମାନେ ଏଥିପାଇଁ ନାହିଁ ନଥିବା ଅସୁବିଧାର ସାମ୍ନା କରୁଛନ୍ତି । ଏହି ଅସୁବିଧା କୌଣସି ଗୋଟିଏ ଜିଲ୍ଲାର ନୁହେଁ ବିଭିନ୍ନ ଜିଲ୍ଲାର ରକ୍ତ ଭଣ୍ଡାରରେ ଏପରି ଅସୁବିଧା ଲାଗି ରହୁଥିଲେ ବି ଏଥିପ୍ରତି କାହାର ଭ୍ରୃକ୍ଷେପ ନାହିଁ ।
ଖବର ଅନୁଯାୟୀ, ବୌଦ୍ଧ ଜିଲ୍ଲାରେ ଦୁଇ ଶହ ପଚାଶ ପ୍ୟାକେଟ କ୍ଷମତା ବିଶିଷ୍ଟ ଦୁଇଟି ଫ୍ରିଜର ରହିଛି । ସେଥିରୁ ଗୋଟିଏ ଖରାପ ଥିବା ବେଳେ କାର୍ଯ୍ୟକରୁଥିବା ଫ୍ରିଜରରେ ଅଛି ସର୍ବମୋଟ ଦଶଟି ରକ୍ତ ପ୍ୟାକେଟ । ଏକଥା ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି ତାହାହିଁ ସତ କଥା । ଏହା ହେଉଛି ବୌଦ୍ଧ ଜିଲ୍ଲାର ଏକ ମାତ୍ର ରକ୍ତ ଭଣ୍ଡାରର ଅସଲ ଚିତ୍ର ।
ବର୍ତ୍ତମାନ ବୌଦ୍ଧ ରକ୍ତ ଭଣ୍ଡାରରେ ଦେଖାଦେଇଛି ଅନେକ ଅସୁବିଧା । ରକ୍ତ ଭଣ୍ଡାର କୋଠାକୁ ନେଇ ଅନେକ ସମସ୍ୟା ଲାଗିରହିଥିବା ବେଳେ ଏଠାରେ ରକ୍ତର ଅଭାବ ରୋଗୀଙ୍କୁ ଅସୁବିଧାରେ ପକାଉଛି ।ଦୂରଦୂରାନ୍ତରୁ ଆସୁଥିବା ରୋଗୀ ଅତି ଜରୁରୀ ସମୟରେ ରକ୍ତ ନମିଳିବା ହେତୁ ବିପଦ ତଥା ଆଶଙ୍କାରେ ରହୁଛନ୍ତି ।
ଏପଟେ ପ୍ରତ୍ୟେକ ରକ୍ତ ଗ୍ରୃପରୁ ଅତିକମରେ ପାଞ୍ଚଟି ଲେଖାଏଁ ରକ୍ତ ରହିବାର ନିୟମ ରହିଥିଲେ ମଧ୍ୟ ରକ୍ତ ଦାନର ଅଭାବ ଯୋଗୁଁ ଏଭଳି ପରିସ୍ଥିତି ସୃଷ୍ଟି ହୋଇଥିବା ରକ୍ତ ଭଣ୍ଡାର ଅଧିକାରୀ କହିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
