ବୌଦ୍ଧ: ଜିଲ୍ଲାରେ ହରିଲୁଟ ହେଉଛି ସରକାରୀ ଖଣିଜ ସମ୍ପଦ । ବାଲି, ପଥର ପାଇଁ ସରକାରଙ୍କ ନିର୍ଦ୍ଦିଷ୍ଟ ନୀତି ନିୟମ ରହିଥିବା ବେଳେ ଅଧିକାଂଶ ସମୟରେ ଏ ସବୁର ବ୍ୟାପକ ଲୁଟ ହେଉଥିବା ଅଭିଯୋଗ ହୋଇଆସୁଛି । ବୌଦ୍ଧ ଜିଲ୍ଲାର ତିନିଗୋଟି ତହସିଲ ଅଧିନରେ ଅନେକ ବାଲିଘାଟ ମୁକୁଳା ପଡିଥିବାବେଳେ ଏହାର ସୁଯୋଗ ନେଇ ବାଲି ମାଫିଆ ଲୁଟ୍ କରୁଛନ୍ତି ।
ଗୁରୁବାର ଏକ ଘଟଣା କ୍ରମରେ ବୌଦ୍ଧ ଜିଲ୍ଲାପାଳ ଲଲାଟେନ୍ଦୁ ମିଶ୍ର ଜରିଖଣ୍ଡି ପରିଦର୍ଶନ କରୁଥିବା ସମୟରେ ସହରର ଭୈରବୀ ମନ୍ଦିର ପରିସରରେ ଶହ ଶହ ଟ୍ରିପ ବାଲି ଗଚ୍ଛିତ ଥିବା ଦେଖି ଆଶ୍ଚର୍ଯ୍ୟ ପ୍ରକାଶ କରିଥିଲେ । ଏଥିସହ ଏନେଇ ତୁରନ୍ତ ପଦକ୍ଷେପ ପାଇଁ ଉଭୟ ପୌର ପ୍ରଶାସନ ଓ ରାଜସ୍ୱ ବିଭାଗକୁ ନିର୍ଦ୍ଦେଶ ଦେଇଥିଲେ ।
ବୌଦ୍ଧ ତହସିଲଦାର ତୁରନ୍ତ ଘଟଣାସ୍ଥଳରେ ପହଞ୍ଚି ଏସବୁ ବାଲିକୁ ସିଜ କରି ପୌର ବିଭାଗର ଜିମା ଦେଇଥିଲେ । ତେବେ ଏତେ ପରିମାଣରେ ବାଲି ଏଠାକୁ କିଭଳି ଓ କେଉଁ ପରିସ୍ଥିତିରେ ଆସିଲା ସେନେଇ ଉଠିଛି ପ୍ରଶ୍ନବାଚୀ । ସେପଟେ ହରଭଙ୍ଗା ତହସିଲ ଅନ୍ତର୍ଗତ ବାଇଶପଡା ଅଞ୍ଚଳରେ ଥିବା ଷ୍ଟୋନ କ୍ରସର ଯୋଗୁଁ ପରିବେଶ ପ୍ରଦୂଷଣ ଓ ସ୍ବାସ୍ଥ୍ୟ ସମସ୍ୟା ଲାଗି ରହୁଥିବା ଦୀର୍ଘ ଦିନରୁ ଅଭିଯୋଗ ହେଉଛି ।
ଏଣୁ ଏନେଇ ଅଞ୍ଚଳରେ ଦିନକୁ ଦିନ ଅସନ୍ତୋଷ ବୃଦ୍ଧି ପାଇବାରେ ଲାଗିଛି । ଏଠାରୁ ପ୍ରତ୍ୟେକ ଦିନ କୋଟି କୋଟି ଟଙ୍କାର ଖଣିଜ ସମ୍ପଦ ଲୁଟ ହେଉଥିବା ଖୋଦ ଜିଲ୍ଲା ପରିଷଦ ସଭ୍ୟ ଅଭିଯୋଗ କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
