ବୌଦ୍ଧ: ଆଦିବାସୀ ମହିଳାଙ୍କ ଲକଡାଉନ ଓ କୋରୋନା ସଂକ୍ରମଣକୁ ନେଇ ନିଆରା ସଚେତନତା ବାର୍ତ୍ତା । ସେପଟେ ଝିଙ୍କେରପାଲି ଗାଁରେ ଅଭିନବ ଶୈଳୀରେ କିଛି ଯୁବକ ବହିରାଗତଙ୍କୁ ପିଢା ଉପରେ ଅତିଥିଙ୍କ ଭଳି ଗୋଡ ହାତ ଧୋଇ ସତ୍କାର କରୁଛନ୍ତି । ବୌଦ୍ଧ ଜିଲ୍ଲାରେ ଦେଖିବାକୁ ମିଳିଛି କୋରୋନା ନେଇ ଏପରି କିଛି ନିଆରା ସଚେତନତା ।
କୋରୋନା ରୋଗ ସମ୍ପର୍କରେ ଜିଲ୍ଲାର ଏହି ଆଦିବାସୀ ମହିଳା ଜଣକ ଜାଣି ନଥିଲେ ବି ଏହା ଯେ ଏକ ମହାମାରି ରୋଗ ତାହା ସେ ବେଶ ଭଲ ଭାବେ ବୁଝି ପାରିଛନ୍ତି । ତେଣୁ ସେ ଏକା ଏକା ବୌଦ୍ଧ ନିକଟସ୍ଥ ଇଛାପୁର ଗାଁ ଛକରେ ଛିଡା ହୋଇ ହାତ ଯୋଡି ସମସ୍ତଙ୍କୁ ସ୍ବଛ ରହିବା ସହ ଘରୁ ନବାହାରିବାକୁ ସବୁଦିନ ଡାକ ଦେଉଛନ୍ତି । ସେପଟେ କଣ୍ଟାମାଳ ବ୍ଲକ ପଲସାଗୋରା ପଞ୍ଚାୟତ ଅନ୍ତର୍ଗତ ଝିଙ୍କେରପାଲି ଗାଁର କିଛି ଯୁବକ ଅଭିନବ ଉଦ୍ୟମ କରି ଲୋକଙ୍କୁ ସଚେତନ କରୁଛନ୍ତି ।
ବାହାରୁ ଆସୁଥିବା ଲୋକଙ୍କୁ ଅତିଥିଙ୍କ ଭଳି ପିଢା ଉପରେ ପ୍ରଥମେ ଗୋଡ ହାତ ଧୋଇ ଆବଶ୍ୟକସ୍ଥଳେ ନୂଆ ରୁମାଲ ମୁହଁରେ ବାନ୍ଧି ଗାଁରେ ପ୍ରବେଶ ଅନୁମତି ଦେଉଛନ୍ତି । ଏପରିକି ଅଞ୍ଚଳକୁ ଆସୁଥିବା ଦାଦନଙ୍କ ପଞ୍ଜୀକରଣ ପଞ୍ଚାୟତରେ ପ୍ରଥମରୁ କରାଇ ନେବାକୁ ଅନୁରୋଧ କରୁଛନ୍ତି । ଗ୍ରାମବାସୀଙ୍କ ଏଭଳି ପ୍ରୟାସ ଏବେ ସବୁଆଡେ ଚର୍ଚ୍ଚାର ବିଷୟ ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
