ବୌଦ୍ଧ: ଜିଲ୍ଲାରେ ନିଅଣ୍ଟିଆ ବର୍ଷା ତଥା କେନାଲରେ ତଳ ମୁଣ୍ଡକୁ ପାଣି ପହଞ୍ଚି ପାରୁନଥିବା କାରଣରୁ ଅନେକ ଜମି ପଡିଆ ପଡିଛି । ଯେଉଁଠି ଚାଷ ହୋଇଛି ସେଠାରେ ପାଣି ଅଭାବରୁ ମାଟି ଫାଟି ଆଁ କରିବା ସହିତ ଧାନ ତଳି ପୋଡିବାକୁ ବସିଛି । ଅଗଷ୍ଟ ମାସର ପ୍ରଥମ ସପ୍ତାହ ପରେ ମଧ୍ୟ ବର୍ଷାର ମାତ୍ରା କମ ରହିଥିବାରୁ ଚିନ୍ତାରେ ଚାଷୀ ।
ବୌଦ୍ଧ ଜିଲ୍ଲା ଦେଇ ମହାନଦୀ ସମେତ ତେଲନଦୀ, ସାଲୁଙ୍କୀ, ବାଘନଦୀ ଭଳି ଅନେକ ନଦୀନାଳ ପ୍ରବାହିତ ହେଉଥିଲେ ମଧ୍ୟ ଚାଷ ସମୟରେ ଦେଖାଦେଉଛି ପାଣି ସମସ୍ୟା । ଉଭୟ ବାଘ ଜଳସେଚନ ଓ ସାଲୁଙ୍କୀ ଜଳସେଚନ ପ୍ରକଳ୍ପରୁ ଚାଷୀକୂଳ ଉପକୃତ ହେଉଥିବା ବେଳେ ଚଳିତ ବର୍ଷ ନିଅଣ୍ଟିଆ ବର୍ଷା ଯୋଗୁଁ କେନାଲର ତଳ ମୁଣ୍ଡକୁ ପାଣି ପହଞ୍ଚି ପାରୁନାହିଁ । ଶନିବାର ଅପରାହ୍ନରେ ଓ ରବିବାର ବୌଦ୍ଧ ଜିଲ୍ଲାର ଅଳ୍ପ କେତେକ ସ୍ଥାନରେ ବୃଷ୍ଟିପାତ ହୋଇଥିଲେ ମଧ୍ୟ ତାହା ଚାଷ ପାଇଁ ପର୍ଯ୍ୟାପ୍ତ ହୋଇନଥିବା ସୂଚନା ମିଳିଛି ।
ସେପଟେ ତଳ ମୁଣ୍ଡରେ ପାଣି ପହଞ୍ଚି ପାରିନଥିବାରୁ ଅନେକ ସ୍ଥାନରେ ଜମି ପଡିଆ ପଡିଛି । ଯେଉଁ କେତେକ ସ୍ଥାନରେ ଚାଷ ହୋଇଛି ସେଠାରେ ପାଣି ଅଭାବରୁ ମାଟି ଫାଟି ଆଁ କରିବା ସହିତ ଧାନ ତଳି ପୋଡିବାକୁ ବସିଛି । ଜିଲ୍ଲା କୃଷି ବିଭାଗ ଓ ଜଳସେଚନ ବିଭାଗ ଏନେଇ କୌଣସି ପଦକ୍ଷେପ ଗ୍ରହଣ କରୁନଥିବା ଚାଷୀ ଅଭିଯୋଗ କରିଛନ୍ତି । କେନାଲର ସଫେଇ କାର୍ଯ୍ୟ ମଧ୍ୟ ଅଧିକାଂଶ ସ୍ଥାନରେ ହୋଇନଥିବା ଚାଷୀ ଅଭିଯୋଗ କରିବା ସହ ତୁରନ୍ତ ଏଦିଗରେ ଆବଶ୍ୟକ ପଦକ୍ଷେପ ଗ୍ରହଣ ପାଇଁ ଦାବି କରିଛନ୍ତି ।
ଇଟିଭି ଭାରତ, ବୌଦ୍ଧ
