ସମସ୍ୟା ଘେରରେ ଗୋପାଳକ, ଅପହଞ୍ଚ ସରକାରୀ ଯୋଜନା

ସମସ୍ୟା ଘେରରେ ଗୋପାଳକ । ବୌଦ୍ଧ ଜିଲ୍ଲାର ଅଧିକାଂଶ ସ୍ଥାନରେ ଥିବା ପ୍ରାଣୀଧନ ଚିକିତ୍ସା କେନ୍ଦ୍ରରେ କର୍ମଚାରୀ ଅଭାବରୁ ସେଠାରେ ତାଲା ଝୁଲିବା ସହ ସେଗୁଡିକ ପରିତ୍ୟକ୍ତ ହୋଇପଡିଛି । ଯାହାକୁ ନେଇ ସମସ୍ୟାର ସମ୍ମୁଖିନ ହେଉଛନ୍ତି ଲୋକେ । ଅଧିକ ପଢନ୍ତୁ

ବୌଦ୍ଧ: ସରକାର ଗୋପାଳକ ଓ ଅନ୍ୟ ପ୍ରାଣୀ ପାଳକଙ୍କ ପାଇଁ ଅନେକ ଯୋଜନା କରିଛନ୍ତି । କିନ୍ତୁ ବାସ୍ତବ ଚିତ୍ର ସମ୍ପୂର୍ଣ୍ଣ ଓଲଟା । ବୌଦ୍ଧ ଜିଲ୍ଲାର ତିନୋଟି ବ୍ଲକର ବିଭିନ୍ନ ସ୍ଥାନରେ କୃଷି ବିଭାଗ ଠାରୁ ନେଇ ପ୍ରାଣୀଧନ ଚିକିତ୍ସା ବିଭାଗର ଅଫିସ ନିର୍ମାଣ ହୋଇଛି । ଏହାଛଡା ଗୋପାଳକ ଓ ଅନ୍ୟ ପ୍ରାଣୀ ପାଳକଙ୍କୁ ବୈଷୟିକ ତଥା ସରକାରୀ ଯୋଜନା ସମ୍ପର୍କରେ ସହାୟତା କରିବାକୁ ସରକାରୀ ବାବୁମାନେ ରହିଛନ୍ତି । କିନ୍ତୁ ଆମ୍ବଗାଁ ଠାରୁ ନେଇ ତଳଗାଁ ପର୍ଯ୍ୟନ୍ତ ଏଭଳି ଗୋ ଚାଷୀମାନେ ସମସ୍ୟା ଭିତରେ ଛନ୍ଦି ହୋଇ ରହିଛନ୍ତି ।

ମୋ ଗୁହାଳ ଯୋଜନା ଠିକରେ ହିତାଧିକାରୀଙ୍କ ନିକଟରେ ପହଞ୍ଚି ପାରୁନାହିଁ । ଫଳରେ ଚାଷୀ ମାନେ ବାଧ୍ୟ ହୋଇ ଗାଈଗୋରୁ, ଛେଳି ମେଣ୍ଢା ରାସ୍ତା କଡରେ, ପାଇଖାନା ଘରେ ନଚେତ ଛୋଟିଆ ଗୁହାଳରେ ଅତି ଦୟନୀୟ ଭାବରେ ଠେଲାଠେଲି କରି ରଖୁଛନ୍ତି ।ଏହାଛଡା ଜିଲ୍ଲାର ଅଧିକାଂଶ ପ୍ରାଣୀଧନ ଚିକିତ୍ସା କେନ୍ଦ୍ରରେ ତାଲା ଝୁଲୁଛି । ଆବଶ୍ୟକ ସଂଖ୍ୟକ କର୍ମଚାରୀ ଅଭାବରୁ ଏସବୁ କେନ୍ଦ୍ର ଗୁଡିକ ପରିତ୍ୟକ୍ତ ହୋଇ ପଡିବା ସହିତ ଅସାମାଜିକ ଲୋକଙ୍କ ଆଡ୍ଡା ସ୍ଥଳରେ ପରିଣତ ହୋଇଯାଇଛି । ତୁରନ୍ତ ଏଦିଗରେ ବିଭାଗୀୟ କର୍ତ୍ତୃପକ୍ଷ ଦୃଷ୍ଟି ଦେଇ ପଦକ୍ଷେପ ଗ୍ରହଣ ପାଇଁ ଦାବି ହୋଇଛି ।


ଇଟିଭି ଭାରତ,ବୌଦ୍ଧ