ବୌଦ୍ଧ: ଚିନ୍ତା ବଢାଇଛି ବୌଦ୍ଧର 35 ନମ୍ବର କୋରୋନା ଆକ୍ରାନ୍ତ । ଗୋଟିଏ ପଟେ 34 ନମ୍ବର ଆକ୍ରାନ୍ତ ଜଣଙ୍କୁ ଚିକିତ୍ସା ପରେ ନିଜ ଘରକୁ ପଠାଯାଇଥିବାବେଳେ ଚିହ୍ନଟ ହୋଇଥିବା ନୂଆ ଆକ୍ରାନ୍ତଙ୍କ କଣ୍ଟାକ୍ଟ ଟ୍ରେସିଙ୍ଗ ଆରମ୍ଭ ହୋଇଛି ।
ସୂଚନା ଅନୁଯାୟୀ, ବୌଦ୍ଧ କୋଭିଡ କେୟାରରେ ଚିକିତ୍ସିତ ହେଉଥିବା 34ତମ କୋରୋନା ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି । ବୌଦ୍ଧ ଜିଲ୍ଲାର ସମସ୍ତ 34ଜଣ ଆକ୍ରାନ୍ତ କ୍ବାରେଣ୍ଟାଟିନ ସେଣ୍ଟରରୁ ଚିହ୍ନଟ ହୋଇ ସୁସ୍ଥ ହୋଇଥିଲେ । କିନ୍ତୁ ମଙ୍ଗଳବାର ଚିହ୍ନଟ ହୋଇଥିବା ଆକ୍ରାନ୍ତ ସମସ୍ତଙ୍କୁ ଚିନ୍ତାରେ ପକାଇଛି ।
କାରଣ ଏହି ନୂଆ ଆକ୍ରାନ୍ତ ଜଣଙ୍କ ସାଧାରଣରୁ ଚିହ୍ନଟ ହୋଇଛନ୍ତି । ନୂଆ ଆକ୍ରାନ୍ତ ଜଣଙ୍କ ବୌଦ୍ଧ ଜିଲ୍ଲା ତେଲିବନ୍ଧ ପଞ୍ଚାୟତ ଅନ୍ତର୍ଗତ ସାପଦୋହଲି ଗ୍ରାମର ବାସିନ୍ଦା ବୋଲି ସୂଚନା ମିଳିଛି । ଗତ କିଛି ଦିନ ତଳେ ସେ ଅସୁସ୍ଥ ହୋଇ ବୌଦ୍ଧ ଡାକ୍ତରଖାନାରେ ଚିକିତ୍ସିତ ହେବା ସହିତ ବିଭିନ୍ନ ସ୍ଥାନରେ ବୁଲିଥିବା ସୂଚନା ମିଳିଛି ।
ବୌଦ୍ଧରେ ତାଙ୍କ ଦେହ ଭଲ ନହେବାରୁ ସେ ଭୁବନେଶ୍ୱର ଏମ୍ସରେ ଚିକିତ୍ସିତ ହେଉଛନ୍ତି । ସେ କୋରୋନା ସଂକ୍ରମିତ ଜଣାପଡିବା ପରେ ଜିଲ୍ଲା ପ୍ରଶାସନ ଓ ସ୍ବାସ୍ଥ୍ୟ ବିଭାଗ ତାଙ୍କ କଣ୍ଟାକ୍ଟ ଟ୍ରେସିଙ୍ଗ ଆରମ୍ଭ କରିବା ସହିତ ସମ୍ପୃକ୍ତ ଅଞ୍ଚଳକୁ ସିଲ କରିଥିବା ସ୍ବାସ୍ଥ୍ୟ ବିଭାଗ ସୂଚନା ଦେଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
