ବୌଦ୍ଧ: ପାଖେଇ ଆସୁଛି ପୌର ନିର୍ବାଚନ । ଏନେଇ ଚଳଚଞ୍ଚଳ ହୋଇ ଉଠିଛି ସହରାଞ୍ଚଳ । ବୌଦ୍ଧ ଜିଲ୍ଲାରେ ଏକ ମାତ୍ର ଏମଏସି ଥିବାବେଳେ ଏହାକୁ ହାତେଇବା ନେଇ ପ୍ରାର୍ଥୀଙ୍କ ରଣନୀତି ପ୍ରସ୍ତୁତ ହେଉଛି ।
ବୌଦ୍ଧ ଜିଲ୍ଲାରେ ଆଜିଠାରୁ ଆରମ୍ଭ ହେଲା ପୌର ନିର୍ବାଚନ ପାଇଁ ବିଜେଡି ଦଳର ପ୍ରଚାର ଅଭିଯାନ । ଜିଲ୍ଲାର ଏକମାତ୍ର ଏନଏସି ବୌଦ୍ଧଗଡ଼ ବିଜ୍ଞାପିତ ଅଞ୍ଚଳ ପରିଷଦର ବିଜେଡି ପ୍ରାର୍ଥୀଙ୍କ ପ୍ରଚାର ଅଭିଯାନ ଆରମ୍ଭ ହୋଇଥିବାବେଳେ ପ୍ରଥମ ଦିନରେ ବୌଦ୍ଧ ବିଧାୟକ ପ୍ରଦୀପ କୁମାର ଅମାତ ଡୋରଟୁ ଡୋର କ୍ୟାମ୍ପେନ ଆରମ୍ଭ କରିଛନ୍ତି । ଗତ ଦୁଇ ଦିନ ପୂର୍ବରୁ ବିଜେପି ଦଳ ସହରର ବିଭିନ୍ନ ବସ୍ତିରେ ପହଞ୍ଚି ମାରାଥନ ପ୍ରଚାର ଆରମ୍ଭ କରିଥିଲା। ତେବେ ଆଜି ବିଜେଡି ଦଳ 6 ନମ୍ବର ଓ୍ବାର୍ଡରୁ ପ୍ରଚାର ଆରମ୍ଭ କରିଛି । ବିଜେଡି ଦଳ ରାଜ୍ୟ ସରକାରଙ୍କ କଲ୍ୟାଣକାରୀ ଯୋଜନାକୁ ଆଧାର କରି ଭୋଟରଙ୍କ ନିକଟରେ ପହଞ୍ଚିବାକୁ ଉଦ୍ୟମ ଜାରି ରଖିଛି। ଏଥିସହ ଦଳ ଭଲ ପ୍ରଦର୍ଶନ କରି ବିଜୟୀ ହେବ ବୋଲି ବିଧାୟକ ଆଶା ପ୍ରକାଶ କରିଛନ୍ତି । ସେପଟେ ଉଭୟ ବିରୋଧୀ ବିଜେପି ଓ କଂଗ୍ରେସ ମଧ୍ୟ ଏନଏସି ହାତେଇବା ପାଇଁ ଜୋରଦାର କସରତ କରୁଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
