ବୌଦ୍ଧ: ସରିଲା ମହାପ୍ରଭୁଙ୍କ ନବଦିନାତ୍ମକ ଘୋଷଯାତ୍ରା । ଭକ୍ତ ଓ ଶ୍ରଦ୍ଧାଳୁଙ୍କ ଗହଣରେ ଚତୁର୍ଦ୍ଧା ବିଗ୍ରହ ମାଉସୀ ମା’ ମନ୍ଦିରରୁ ଶ୍ରୀମନ୍ଦିର ଅଭିମୁଖେ ବାହୁଡିଛନ୍ତି । ରଥ, ପଥ ସବୁ ଏକାକାର ହୋଇ ଜନସମୂଦ୍ର ମଧ୍ୟରେ ଠାକୁରଙ୍କ ଏହି ଦିବ୍ୟ ଉତ୍ସବରେ ସାମିଲ ହୋଇଥିଲେ ।
ଶୁକ୍ରବାର ସମାପନ ହୋଇଛି ରଥଯାତ୍ରାର ଶେଷ ସୋପାନ, ବାହୁଡାଯାତ୍ରା । ତେଣୁ ପଶ୍ଚିମ ଓଡ଼ିଶାର ସବୁଠାରୁ ବଡ଼ ରଥଯାତ୍ରା ଭାବେ ପରିଚିତ ବୌଦ୍ଧ ସହରରେ ଦିନ ତମାମ ଗହଳି ଲାଗି ରହିଥିଲା । ଗହଳି ମଧ୍ୟ ଏପରି ରହିଥିଲା ଯେ କିଲୋମିଟର କିଲୋମିଟର ଧରି କେବଳ ଜନସମୂଦ୍ର ହିଁ ଦୃଶ୍ୟମାନ ହେଉଥିଲା ।
ତେବେ ବୌଦ୍ଧଗଡରେ ସ୍ବତନ୍ତ୍ର ଭାବେ ନିର୍ମିତ ହେଉଥିବା ଅଭଙ୍ଗା ରଥକୁ ଦେଖିବା ସହ ଶ୍ରୀଜିଉଙ୍କ ଦର୍ଶନ କରିବାକୁ ଜିଲ୍ଲା ବ୍ୟତୀତ ଜିଲ୍ଲା ବାହାରୁ ମଧ୍ୟ ଶ୍ରଦ୍ଧାଳୁଙ୍କ ଭିଡ ଜମିଥିଲା । ଏଥିସହ ଗଡର ମୁଖ୍ୟ ରଥ ସହିତ ହରିଗୁଡି ରଥକୁ କେବଳ ମହିଳାମାନେ ଟାଣୁଥିବାରୁ ମହିଳା ଭକ୍ତମାନେ ମଧ୍ୟ ବେଶ ଉତ୍ସାହିତ ରହିଥିଲେ ।
ନିଜେ ଜିଲ୍ଲାପାଳ ଲଲାଟେନ୍ଦୁ ମିଶ୍ର, ଉପଜିଲ୍ଲାପାଳ ଏନସି ଜ୍ୟୋତି ରଞ୍ଜନ ନାଏକ ପ୍ରମୁଖ ବାହୁଡା ଯାତ୍ରାରେ ଉପସ୍ଥିତ ରହି ସମସ୍ତ କାର୍ଯ୍ୟର ତଦାରଖ କରିବା ସହ ରଥଟଣାରେ ସାମିଲ ହୋଇଥିଲେ । ତେବେ ଶନିବାର ଶ୍ରୀବିଗ୍ରହଙ୍କ ସୁନାବେଶ ଅବସରରେ ପରମ୍ପରା ଅନୁଯାୟୀ ଫୁଲବେଶ ଅନୁଷ୍ଠିତ ହେବ । ଏଣୁ ସମସ୍ତ ପ୍ରକାର ପ୍ରସ୍ତୁତି ଚୂଡାନ୍ତ ହୋଇଥିବା ଜଣାପଡିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
