ବୌଦ୍ଧ: କୃଷି ଭିତ୍ତିକ ଜିଲ୍ଲାରେ(agricultural district) ଜଳସେଚନକୁ ନେଇ ଦେଖାଦେଇଛି ସମସ୍ୟା। ବୌଦ୍ଧ ଜିଲ୍ଲାରେ ମହାନଦୀ ସମେତ ବାଘ, ସାଲୁଙ୍କୀ, ଖଡଙ୍ଗ, ତେଲନଦୀ ଭଳି ଅନେକ ନଦନଦୀ ପ୍ରବାହିତ ହେଉଛି । ଜିଲ୍ଲାରେ ବାଘ ଓ ସାଲୁଙ୍କୀ ଜଳସେଚନ ପ୍ରକଳ୍ପ କାର୍ଯ୍ୟକାରୀ ହେଉଥିବା ବେଳେ ଦୀର୍ଘ ବର୍ଷ ହେଲା ଟିକରପଡା ପଞ୍ଚାୟତ ଗୁରୁଜୀମୁଣ୍ଡାଠାରେ ସାଲୁଙ୍କୀ ନଦୀରେ ସ୍ବଳ୍ପ ବ୍ୟୟରେ ଏକ ବ୍ୟାରେଜ ନିର୍ମାଣ ପାଇଁ ଦାବି ହୋଇଆସୁଛି । ଉକ୍ତ ପ୍ରକଳ୍ପ ନିର୍ମାଣ ହେଲେ ବୌଦ୍ଧ ଓ ହରଭଙ୍ଗା ବ୍ଲକର ଶହ ଶହ ଏକର ଜମିକୁ ଜଳସେଚନ ହୋଇପାରିବ ବୋଲି ସମ୍ଭାବନା ରହିଛି । କିନ୍ତୁ ଏନେଇ ଜଳସେଚନ ବିଭାଗ କୌଣସି ପଦକ୍ଷେପ ଗ୍ରହଣ କରୁନଥିବାରୁ ଚାଷୀ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି ।
ସେହିପରି ମହାନଦୀ କୂଳରେ ଅବସ୍ଥିତ ହରଭଙ୍ଗା ବ୍ଲକର ରାମଗଡ, ସାମ୍ପୋଚ, ଧଳପୁରଠାରେ ମେଗା ଉଠାଜଳସେଚନ ନିର୍ମାଣ ପାଇଁ ଭିତ୍ତି ପ୍ରସ୍ତର ସ୍ଥାପନର ଦୀର୍ଘ ବର୍ଷ ପରେ ମଧ୍ୟ ସେହି ପ୍ରକଳ୍ପଗୁଡିକ କାର୍ଯ୍ୟକାରୀ ହୋଇନଥିବା ଅଭିଯୋଗ ହୋଇଛି । ଏନେଇ ଉଭୟ ଜିଲ୍ଲା ବିଜେପି ଓ ଜିଲ୍ଲା ଭାରତୀୟ କିଷାନ ସଂଘ ପକ୍ଷରୁ ତୀବ୍ର ଅସନ୍ତୋଷ ପ୍ରକାଶ ପାଇବା ସହ ଆଗାମୀ ଦିନରେ ଆନ୍ଦୋଳନ ପାଇଁ ସଜବାଜ ହେଉଥିବା ସୂଚନା ମିଳିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
