ବୌଦ୍ଧ: ଜିଲ୍ଲାରେ ଦୁଇ ଦିନର ସଟଡାଉନ ପରେ ଆଜି ବଜାର ଖୋଲିବାରୁ ଲୋକଙ୍କ ଅସମ୍ଭବ ଭିଡ଼ ଦେଖିବାକୁ ମିଳିଛି । ଯାହା କୋରୋନା ସଂକ୍ରମଣର ଆଶଙ୍କାକୁ ବଢାଇ ଦେଇଛି । ଆଗାମୀ 26 ତାରିଖ ପର୍ଯ୍ୟନ୍ତ କେବଳ ଅତ୍ୟାବଶ୍ୟକୀୟ ସାମଗ୍ରୀ ଦୋକାନ ଖୋଲିବାକୁ ନିର୍ଦ୍ଦେଶ ସତ୍ତ୍ବେ ଅନେକ ସ୍ଥାନରେ ଏହାର ଉଲ୍ଲଂଘନ ହେଉଥିବା ଅଭିଯୋଗ ହୋଇଛି ।
ବୌଦ୍ଧ ଜିଲ୍ଲାରେ ଗତ ଶନିବାର ଓ ରବିବାର ସାପ୍ତାହିକ ସଟଡାଉନ ପରେ ଆଜି ବଜାର ଖୋଲିଥିଲା । ତେବେ ବଜାରରେ ଏଭଳି ଅସମ୍ଭାଳ ଭିଡ ଦେଖା ଯାଇଥିଲା ଯେ ତୁରନ୍ତ ପୌର ପ୍ରଶାସନ ପକ୍ଷରୁ ତିନୋଟି ସ୍ଥାନରେ ପରିବା ବଜାର ପାଇଁ ନିଷ୍ପତ୍ତି ନିଆଯାଇଛି ।
ସେପଟେ ଆସନ୍ତା 26 ତାରିଖ ପର୍ଯ୍ୟନ୍ତ ପ୍ରଶାସନ ବୌଦ୍ଧକୁ ଲକଡାଉନ ଘୋଷଣା ସହିତ କେବଳ ଅତ୍ୟାବଶ୍ୟକୀୟ ସାମଗ୍ରୀ ପାଇଁ ଅନୁମତି ଦିଆଯାଇଥିଲେ ମଧ୍ୟ ଅନେକ ସ୍ଥାନରେ ଏହାର ଖୋଲା ଉଲ୍ଲଂଘନ ହେଉଥିବା ଅଭିଯୋଗ ହୋଇଛି । ଅନେକ ସ୍ଥାନରେ ଦୋକାନ ଖୋଲାକୁ ନେଇ ଦୋକାନୀ ଦ୍ଵନ୍ଦରେ ରହିଥିବା ବେଳେ ବିଦେଶୀ ମଦ ଦୋକାନ କିନ୍ତୁ ଖୋଲା ଯାଇଥିଲା ।
ତେବେ ବଜାରରେ ପ୍ରବଳ ଭିଡ ହେତୁ ସାମାଜିକ ଦୂରତା ରହୁ ନଥିବାରୁ ସଂକ୍ରମଣର ଭୟ ସୃଷ୍ଟି ହେବାକୁ ନେଇ ବୁଦ୍ଧିଜୀବୀ ଚିନ୍ତା ପ୍ରକାଶ କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
