ବୌଦ୍ଧ: ଅଧପନ୍ତରିଆ ହୋଇ ପଡିରହିଛି ଗେଟାମୁଣ୍ଡା ପୋଲ । ବନ୍ୟା ପାଣି ଯିବାର 5 ବର୍ଷ ବିତି ଯାଇଥିଲେ ମଧ୍ୟ ଏବେ ପର୍ଯ୍ୟନ୍ତ ପୋଲ ନିର୍ମାଣ କାର୍ଯ୍ୟ ଶେଷ ହେବାର ନାଁ ଧରୁନି । ପଶ୍ଚିମ ଓଡିଶା ଓ ଦକ୍ଷିଣ ଓଡିଶାର ମୁଖ୍ୟ ତଥା ଏକମାତ୍ର ସଂଯୋଗ ବ୍ୟବସ୍ଥା ଥିବା ଏହି ନିର୍ମାଣଧୀନ ପୋଲ ପାଇଁ ସାଧାରଣ ଲୋକ ନାହିଁନଥିବା ହଇରାଣ ହେଉଛନ୍ତି ।
ଖବର ଅନୁଯାୟୀ, ଗତ ପ୍ରାୟ 5 ବର୍ଷ ତଳେ ପାହାଡିଆ ଗେଟାମୁଣ୍ଡା ଝରଣାରେ ବନ୍ୟା ଜଳ ଆସି ପୂର୍ବରୁ ଥିବା ପୋଲକୁ ସମ୍ପୂର୍ଣ୍ଣ ଧୋଇ ନେଇଥିଲା । ଏହାକୁ ଦୃଷ୍ଟିରେ ରଖି ସରକାର ଏହା ଉପରେ ହାଇଲେବେଲ ବ୍ରିଜ କରିବାକୁ ନିଷ୍ପତ୍ତି କରି ଏକ ଘରୋଇ କମ୍ପାନୀକୁ ପୋଲ ନିର୍ମାଣ ପାଇଁ ଠିକା ଦେଇଥିଲେ ।
ବୌଦ୍ଧ ଜିଲ୍ଲାର ହରଭଙ୍ଗା ବ୍ଲକ ସଦର ମହକୁମାଠାରୁ ମାତ୍ର ପାଞ୍ଚ କିଲୋମିଟର ଦୂରରେ ଥିବା ଏହି ନାଳ ରାସ୍ତା ଉପରେ ପ୍ରତ୍ୟେହ ହଜାର ହଜାର ଗାଡି ମୋଟର ନିର୍ଭର କରିଥାନ୍ତି । କିନ୍ତୁ ଇତି ମଧ୍ୟରେ ଦୀର୍ଘଦିନ ବିତିଯିବାକୁ ବସିଥିଲାବେଳେ ପୋଲ କାମ ସମ୍ପୂର୍ଣ୍ଣ ହେବାର ନାଁ ଧରୁନି । ଏବେ ବର୍ଷା ଦିନ ପହଞ୍ଚି ଯାଇଥିବାବେଳେ ଏହି ରାସ୍ତାରେ ଗମନାଗମନ ଅତ୍ୟନ୍ତ ଦୁର୍ବିସହ ହୋଇପଡୁଥିବା ଅଭିଯୋଗ ହୋଇଛି । ଏପଟେ ମନ୍ଥର ଗତିରେ ପୋଲ କାମ ହେଉଥିବାରୁ ଚଳିତ ବର୍ଷା ଋତୁରେ ମଧ୍ୟ ଯାତାୟତରେ ସମସ୍ୟା ଉପୁଜିବା ଏକ ପ୍ରକାର ନିଶ୍ଚିତ ହୋଇଯାଇଛି । ତୁରନ୍ତ ଏଦିଗରେ ବିଭାଗୀୟ କର୍ତ୍ତୃପକ୍ଷ ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
