ବୌଦ୍ଧ: ବଣଜଙ୍ଗଲ ଅଞ୍ଚଳର ବିକାଶ ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ଯୋଜନା ପ୍ରଣୟନ କରି ଅଜସ୍ର ଅର୍ଥ ବ୍ୟୟ କରିନ୍ତି। କିନ୍ତୁ ଏବେ ମଧ୍ୟ ଅପହଞ୍ଚ ଅଞ୍ଚଳରେ ବାଟବଣା ସରକାରୀ ଯୋଜନା । ଶିକ୍ଷା, ସ୍ବାସ୍ଥ୍ୟ, ଗମନାଗମନ ଭଳି ମୌଳିକ ସୁବିଧା ମଧ୍ୟ ମିଳିପାରୁନାହିଁ ।
ବୌଦ୍ଧ ଜିଲ୍ଲାର ଆଢେଣୀଗଡ ପଞ୍ଚାୟତର ଏକ ଉପାନ୍ତ ଆଦିବାସୀ ଗାଁ କୁଚୁଡା । ଏହି ଗାଁ ବୌଦ୍ଧ ଓ କନ୍ଧମାଳ ଜିଲ୍ଲାର ସୀମାନ୍ତ ଘଞ୍ଚ ଜଙ୍ଗଲ ମଧ୍ୟରେ ଅବସ୍ଥିତ । ଏହି ଗାଁରେ ସରକାରୀ ଯୋଜନା ଏବେବି ଅପହଞ୍ଚ । ଗାଁର ଆଶ୍ରମ ବିଦ୍ୟାଳୟରେ 9 ଜଣ ଛାତ୍ରଛାତ୍ରୀ ପାଠ ପଢୁଥିବା ବେଳେ ଶିକ୍ଷାନୁଷ୍ଠାନଟି ବହୁବିଧ ସମସ୍ୟାରେ ଘେରି ରହିଛି । ଗାଁରେ ସରକାରଙ୍କ ଆବାସ ଯୋଜନା ଠାରୁ ଆରମ୍ଭ କରି ଅଙ୍ଗନବାଡି ଓ ଅନ୍ୟ ସରକାରୀ ବ୍ୟବସ୍ଥା ସତେ ଯେମିତି ଏମାନଙ୍କ ପାଇଁ ଅପହଞ୍ଚ ହୋଇପଡିଛି । ଗାଁ କୁ ସଂଯୋଗ କରୁଥିବା ଏକମାତ୍ର ରାସ୍ତାରେ ଥିବା ପୋଲ ଦୀର୍ଘ ଦଶ ବର୍ଷ ହେଲା ଧୋଇ ନେଇଥିଲେ ମଧ୍ୟ ମରାମତି ହୋଇପାରିନି ।
ଏଭଳି ଏକ ଅପହଞ୍ଚ ଗାଁରେ ସ୍ବାସ୍ଥ୍ୟ ଶିବିର ଆୟୋଜନ କରି ଲୋକଙ୍କ ଦୁଃଖ ଶୁଣିବା ସହ ଆଗାମୀ ଦିନରେ କିଭଳି ଏହାର ସମାଧାନ ହୋଇପାରିବ ସେଦିଗରେ ଚେଷ୍ଟା କରିବେ ବୋଲି କହିଛନ୍ତି ବୌଦ୍ଧ ଜିଲ୍ଲାପାଳ ଲଲାଟେନ୍ଦୁ ମିଶ୍ର ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
