କିଡନୀ ରୋଗରେ ଛଟପଟ ସାନିଆ

4 ବର୍ଷର ଶିଶୁକନ୍ୟା କିଡନୀ ରୋଗରେ ଆକ୍ରାନ୍ତ । ଝିଅର ଚିକିତ୍ସା ପାଇଁ ଡାକ୍ତରଖାନାକୁ ଦୌଡି ଦୌଡି ସର୍ବଶ୍ବାନ୍ତ ହୋଇପଡିଥିବା ବେଳେ ସରକାରୀ ସହାୟତା ଅପେକ୍ଷାରେ ରହିଛନ୍ତି ପରିବାର ଲୋକେ ।

ବୌଦ୍ଧ: କଅଁଳ ବୟସରେ ବିରଳ ରୋଗ । ଯେଉଁ ବୟସରେ ହସଖୁସିରେ ଖେଳିବା କଥା ସେହି ବୟସରେ ଯନ୍ତ୍ରଣାରେ ଛଟପଟ ହେଉଛି ବୌଦ୍ଧ କିର୍ଲା ଗାଁ ର ସାନିଆ । ଅର୍ଥାଭାବରୁ ଆଶା ଶୂନ୍ୟ ହୋଇ ସରକାରୀ ସହାୟତା ଅପେକ୍ଷାରେ ରହିଛନ୍ତି ପରିବାର ଲୋକେ ।

ବୌଦ୍ଧ ଜିଲ୍ଲା ସିମିଳିପଦର ପଞ୍ଚାୟତ ଅନ୍ତର୍ଗତ କିର୍ଲା ଗ୍ରାମର ବୃନ୍ଦାବନଙ୍କ ପ୍ରଥମ କନ୍ୟା ସନ୍ତାନ ଭାବେ 4 ବର୍ଷ ତଳେ ଜନ୍ମ ଗ୍ରହଣ କରିଥିଲା ସାନିଆ । ସାନିଆ ଦେଢ ବର୍ଷର ଥିବାବେଳେ ବାରମ୍ବାର ତାର ଦେହ ଖରାପ ହେବାରୁ ଡାକ୍ତରଖାନାରେ ପରୀକ୍ଷା ପରେ କିଡନୀ ସମସ୍ୟା ଥିବା ଜଣାପଡିଥିଲା । ବାସ ତା ପରଠାରୁ ଆଜକୁ ପ୍ରାୟ ଅଢେଇ ବର୍ଷ ହେଲା ସାନିଆ କୁ ନେଇ ପରିବାର ବିଭିନ୍ନ ଡାକ୍ତରଖାନାକୁ ଦୌଡି ଦୌଡି ସର୍ବଶ୍ବାନ୍ତ ହୋଇ ଗଲେଣି ।

ସାନିଆଙ୍କ ବାପାଙ୍କ କହିବାନୁଯାୟୀ କଟକ ବଡ ଡାକ୍ତରଖାନାରେ ପାଖାପାଖି 25 ଥର ସାନିଆକୁ ଚିକିତ୍ସିତ କରାଯାଇଛି । ଆଉ ଏବେ ସାନିଆ ର ଦୁଇଟି ଯାକ କିଡନୀ ଫେଲ ହୋଇସାରି ଅତ୍ୟନ୍ତ ବିପଜ୍ଜନକ ସ୍ଥିତିରେ ପହଞ୍ଚିଲାଣି ବୋଲି ଚିକିତ୍ସା କରୁଥିବା ଡାକ୍ତର କହିଛନ୍ତି । ସାନିଆ ର ପେଟ ଓ ଗୁପ୍ତ ଅଙ୍ଗ ମଧ୍ୟ ବେଶ ଅସ୍ବାଭାବିକ ବୃଦ୍ଧି ପାଉ ଥିବାରୁ ସେ ଯନ୍ତ୍ରଣା ରେ ଛଟପଟ ହେବାସହ କୌଣସି ପ୍ରକାର କଥାବାର୍ତ୍ତା କରି ପାରୁ ନାହିଁ । ଶିଶୁ କନ୍ୟାଟିର ଅବସ୍ଥା ଗୁରୁତର ଥିବାରୁ ବୌଦ୍ଧ ଡାକ୍ତର ତାକୁ ବୁର୍ଲା କିମ୍ବା କଟକ ନେବାକୁ ପରାମର୍ଶ ଦେଇଛନ୍ତି । କିନ୍ତୁ ଅର୍ଥାଭାବରୁ ବୃନ୍ଦାବନ ଏବେ ନିରୂପାୟ । ତେଣୁ ଇଟିଭି ଭାରତ ମାଧ୍ୟମରେ ସେ ସରକାରଙ୍କୁ ସହାୟତା ପାଇଁ ଆକୁଳ ନିବେଦନ କରିଛନ୍ତି ।

ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ