ବୌଦ୍ଧ: ବାଇକ ଡିକିରୁ ଦୁଇ ଲକ୍ଷ ତିରିଶ ହଜାର ଟଙ୍କା ଲୁଟ । ଜଣେ ଯୁବକଙ୍କ ବାଇକ ଡିକିରୁ ଟଙ୍କା ଲୁଟ ହୋଇଥିବା ବୌଦ୍ଧ ଥାନାରେ ଲିଖିତ ଅଭିଯୋଗ ହୋଇଛି । ବୌଦ୍ଧ ସଦର ମହକୁମାରେ ଥିବା ବ୍ୟାଙ୍କ ଅଫ ବରୋଦାରୁ ଟଙ୍କା ବାହାର କରି ଡିକିରେ ରଖି ଫେରିବା ବାଟରେ ଟଙ୍କା ଲୁଟ ହୋଇଥିବା ଅଭିଯୋଗ ହୋଇଛି ।
ସୂଚନା ମୁତାବକ ବୌଦ୍ଧ ଜିଲ୍ଲାର ବାଉଁଶୁଣୀ ଥାନା ଅନ୍ତର୍ଗତ କଣ୍ଠା ଗ୍ରାମର ପଞ୍ଚାନନ ସାହୁ ବୌଦ୍ଧ ସ୍ଥିତ ବ୍ୟାଙ୍କ ଅଫ ବରୋଦାରୁ ଦୁଇ ଲକ୍ଷ ତିରିଶ ହଜାର ଟଙ୍କା ଏକ ବ୍ୟାଗରେ ଭରି ନିଜ ବାଇକ ଡିକିରେ ରଖିଥିଲେ । ନିକଟସ୍ଥ ଏକ ଘଡି ଦୋକାନରୁ ଫେରିବା ସମୟରେ ତାଙ୍କ ଡିକି ଭାଙ୍ଗି କେହି ଦୁର୍ବୃତ୍ତ ଉକ୍ତ ଟଙ୍କାକୁ ଲୁଟ କରିଥିଲେ । ଏ ନେଇ ବୌଦ୍ଧ ଥାନାରେ ଲିଖିତ ଅଭିଯୋଗ କରିଛନ୍ତି । ଉକ୍ତ ଟଙ୍କା ସହିତ ଆଉ କିଛି ଚେକ ମଧ୍ୟ ଥିଲା ବୋଲି ପଞ୍ଚାନନ ଅଭିଯୋଗ କରିଛନ୍ତି ।
ଏ ସମ୍ପର୍କରେ ଦୁଇ ଜଣ ଯୁବକକୁ ସନ୍ଦେହରେ ଥାନାରେ ଅଟକ ରଖାଯାଇଛି । ତେବେ ଘଟଣାର ସତ୍ୟତା କେତେ ଦୂର ତଥା କେଉଁ ପରିସ୍ଥିତିରେ ଏଭଳି ଘଟଣା ଘଟିଲା ସେନେଇ ତଦନ୍ତ ଆରମ୍ଭ କରିଛି ପୋଲିସ ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
