ବୌଦ୍ଧ: କୋରୋନା ଯୋଦ୍ଧାଙ୍କ ସମ୍ମାନ ଉଦ୍ଦେଶ୍ୟରେ ନିର୍ମିତ ହେଲା ଦୁଇଟି ଭିଡିଓ । କୋରୋନା ମହାମାରୀ ସମୟରେ ନିଜ ଜୀବନକୁ ଖାତିର ନକରି ଆକ୍ରାନ୍ତଙ୍କ ସେବାରେ ନିଜକୁ ନିୟୋଜିତ ରଖିଥିବା କୋରୋନା ଯୋଦ୍ଧାଙ୍କୁ ସମ୍ମାନ ଜଣାଇବା ଉଦ୍ଦେଶ୍ୟରେ ନିର୍ମିତ ହେଲା ଡକ୍ୟୁମେଣ୍ଟାରୀ ଭିଡିଓ ଓ ପ୍ରମୋ ଭିଡିଓ । ଡକ୍ୟୁମେଣ୍ଟାରୀ ଭିଡିଓକୁ ସାଂସ୍କୃତିକ ଅନୁଷ୍ଠାନ ପ୍ରଣାମ ପ୍ରସ୍ତୁତ କରିଥିବା ବେଳେ ପ୍ରମୋ ଭିଡିଓକୁ ଜିଲ୍ଲା ପ୍ରଶାସନ ପକ୍ଷରୁ ପ୍ରସ୍ତୁତ କରାଯାଇଛି ।
ଲକଡାଉନର ଚତୁର୍ଥ ପର୍ଯ୍ୟାୟ ଶେଷରେ କୋରୋନା ଯୋଦ୍ଧାଙ୍କୁ ଡକ୍ୟୁମେଣ୍ଟାରୀ ମାଧ୍ୟମରେ ସମ୍ମାନ ପ୍ରଦାନ କରାଯାଇଛି । ବୌଦ୍ଧର ସାଂସ୍କୃତିକ ଅନୁଷ୍ଠାନ ପ୍ରଣାମ ପକ୍ଷରୁ ସ୍ବାସ୍ଥ୍ୟକର୍ମୀ, ପୋଲିସ, ଅଗ୍ନିଶମବାହୀନି, ସାମ୍ବାଦିକ, ସଫେଇ କର୍ମଚାରୀଙ୍କ କାର୍ଯ୍ୟ ସହିତ ଜଡ଼ିତ କୋଭିଡ ଯୋଦ୍ଧାଙ୍କୁ ସମ୍ମାନ ଜଣାଇବା ଉଦ୍ଦେଶ୍ୟରେ ଏହି ଡକ୍ୟୁମେଣ୍ଟାରୀ ଭିଡିଓ ପ୍ରସ୍ତୁତ କରାଯାଇଛି । ଶନିବାର ସଂଧ୍ୟାରେ ଏହି ଡକ୍ୟୁମେଣ୍ଟାରୀ ଭିଡିଓର ପ୍ରିମିୟର ଜିଲ୍ଲାପାଳଙ୍କ କାର୍ଯ୍ୟାଳୟରେ ପ୍ରଦର୍ଶିତ ହେବା ସହିତ ଉଚ୍ଚ ପ୍ରଶଂସିତ ହୋଇଥିଲା ।
ସେହିପରି ଶନିବାର ଦିନ ଜିଲ୍ଲାର ବିଭିନ୍ନ ସ୍ଥାନରେ ହୋଇଥିବା ବନ୍ଦେ ଉତ୍କଳ ଜନନୀ ସମୂହ ସଂଗୀତ ଗାନର ଏକ ପ୍ରୋମୋ ଭିଡିଓ ଜିଲ୍ଲା ପ୍ରଶାସନ ପକ୍ଷରୁ ପ୍ରସ୍ତୁତ କରାଯାଇଛି।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
