ବୌଦ୍ଧ: ଯନ୍ତ୍ରଣା ଲୁହରେ କଟୁଛି ଜୀବନ । ଯେଉଁ ବୟସରେ ହସିଖେଳି ଦିନ କାଟିବା କଥା ସେହି ବୟସରେ ରୋଗାକ୍ରାନ୍ତ ହୋଇ ମାନସିକ ଯନ୍ତ୍ରଣା ଭୋଗିବା ଅତ୍ୟନ୍ତ ଦୁଃଖଦ । ରୋଗ ପୁଣି ସପ୍ତାହେ କିମ୍ବା ମାସକର ନୁହେଁ । ଏହା ଦୀର୍ଘ ଦଶ ବର୍ଷରୁ ଅଧିକ ହେବ ଏହି ଯନ୍ତ୍ରଣାରେ ଛଟପଟ ହେଉଛି ରୁନୁ ।
ଝିଅକୁ ବୟସ ଷୋହଳ ବର୍ଷ ହେବାକୁ ବସିଲାଣି । ହେଲେ ଠିକ ଭାବରେ କଥା କହି ପାରୁନାହିଁ । ଝିଅକୁ ଯେତେବେଳେ ଚାରି ବର୍ଷ ହୋଇଥିଲା, ସେତେବେଳେ ସେ ହୃଦରୋଗରେ ପୀଡିତ ଥିବା ଡାକ୍ତର କହିଥିଲେ । ଯେଉଁଥିପାଁଇ ସେ ଠିକ ଭାବେ କଥା କହିବାକୁ ସମର୍ଥ ହେଲାନି ।
ବୌଦ୍ଧ ଜିଲ୍ଲା ହରଭଙ୍ଗା ବ୍ଲକର ବାମଣ୍ଡା ସଦରମହକୁମାରେ ବାସ କରୁଥିବା ବିଜୟ କହଁର ଓ ବାସନ୍ତୀ କହଁରଙ୍କ ଦୁଇ ଝିଅ ଓ ଗୋଟିଏ ପୁଅ । ସେଥିମଧ୍ୟରୁ ରୁନୁ ହେଉଛି ସାନ ଝିଅ । ବିଜୟ କହଁର ଦିନ ମଜୁରିଆ ଭାବେ ଯାହା ରୋଜଗାର କରନ୍ତି ପାଞ୍ଚ ପ୍ରାଣୀ କୁଟୁମ୍ବକୁ ନିଅଣ୍ଟ । ତଥାପି ଝିଅ ରୁନୁର ହୃଦରୋଗର ଚିକିତ୍ସା ନିମନ୍ତେ ବୌଦ୍ଧ, ତବୁର୍ଲା, କଟକ,ଭୁବନେଶ୍ବର ଭଳି ଅନେକ ସ୍ଥାନର ଡାକ୍ତରଖାନାକୁ ଦେଖେଇସାରିଲାଣି । ଯାହା ଅର୍ଥ ଥିଲା ସବୁ ସାରି ଏବେ ଭଗବାନଙ୍କ ଭରସାରେ ରହିଛନ୍ତି ।
ଏପଟେ ଝିଅ ରୁନୁର ସ୍ବାସ୍ଥ୍ୟାବସ୍ଥା ଦିନକୁ ଦିନ ବିଗିଡିବାରେ ଲାଗିଛି । ବଞ୍ଚିବାର ଆଶାନେଇ ସଂଘର୍ଷ କରୁଥିବା ଏହି ଝିଅଟି ଏବେ ଆର୍ଥିକ ସହାୟତା ଅପେକ୍ଷା ରଖିଛି । ତୁରନ୍ତ ପ୍ରଶାସନ ପକ୍ଷରୁ ରୁନୁର ଚିକିତ୍ସା ନିମନ୍ତେ ସାହାଯ୍ୟର ହାତ ବଢିଲେ ହୁଏତ ସେ ବଞ୍ଚିଯାଇପାରନ୍ତା ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
