ଭଦ୍ରକ: ମହିଳାଙ୍କୁ ଯୋଜନାବଦ୍ଧ ଭାବେ ହତ୍ୟା କରାଯାଇଥିବା ଅଭିଯୋଗ । ଆତ୍ମହତ୍ୟାର ରୂପ ଦେବାପାଇଁ ଶଶୁରଘର ଲୋକ ରଶିରେ ଟାଙ୍ଗି ଦେଇଥିବା ମୃତ ମହିଳାଙ୍କ ପରିବାର ଅଭିଯୋଗ କରିଛନ୍ତି । ନଣନ୍ଦ ଓ ଶଶୁରଙ୍କୁ ମେଡିକାଲରେ ଅଟକ ରଖିଛନ୍ତି ସ୍ଥାନୀୟ ଲୋକେ । ମୃତକ ହେଉଛନ୍ତି ତିହିଡି ଥାନା ତାଳପଦା ପଞ୍ଚାୟତ ଅଧିନ ଚବିଶପ୍ରହରୀ ଅଞ୍ଚଳର ବିଜୟ ନାୟକଙ୍କ ପତ୍ନୀ ମୋନାଲିସା ନାୟକ(୨୩) ।
ସୂଚନା ଅନୁସାରେ, ଗତ ୫ ବର୍ଷ ତଳେ ମୋନାଲିସା ବୈଦିକ ରିତିରେ ବିଜୟଙ୍କୁ ବିବାହ କରିଥିଲେ । ଉଭୟଙ୍କର ଗୋଟିଏ ପୁଅ ଓ ଗୋଟିଏ ଝିଅ ରହିଛନ୍ତି । ବିଭିନ୍ନ ସମୟରେ ମୋନାଲିସାଙ୍କ ପ୍ରତି ତାଙ୍କ ବିବାହିତା ନଣନ୍ଦ ମାନସିକ ଓ ଶାରିରୀକ ନିର୍ଯାତନା ଦେଉଥିବା ନେଇ ବାପଘର ଲୋକ ଅଭିଯୋଗ କରିଛନ୍ତି । ଯାହାକୁ ନେଇ ମୃତକଙ୍କ ବାପଘର ଲୋକେ ବହୁବାର ଆପୋଷ ବୁଝାବଣା ମଧ୍ୟ କରିଛନ୍ତି । ତେବେ ଶନିବାର ମଧ୍ୟାହ୍ନରେ ଝିଅର ମୃତ୍ୟୁ ଖବର ଶୁଣି ତିହିଡି ମେଡିକାଲରେ ପହଞ୍ଚିଥିଲେ ପରିବାର ଲୋକେ ।
ସେପଟେ ମୃତଦେହ ପାଖରେ କେବଳ ବୃଦ୍ଧ ଶଶୁର ବସିଥିବା ବେଳେ ନଣନ୍ଦ ମେଡିକାଲରୁ ଚମ୍ପଟ ମାରିଥିଲେ । ପରେ ଉତ୍ୟକ୍ତ ଲୋକେ ନଣନ୍ଦଙ୍କୁ ରାସ୍ତାରୁ ଧରି ଆଣି ମେଡିକାଲରେ ଅଟକ ରଖିଛନ୍ତି । ମୃତ ମହିଳାଙ୍କ ବେକରେ କୌଣସି ଦାଗ ନଥିବାରୁ ଶଶୁର ଘର ଲୋକେ ମୋନାଲିସାକୁ ହତ୍ୟା କରି ଆତ୍ମହତ୍ୟାର ରୂପ ଦେଉଥିବା ନେଇ ଅଭିଯୋଗ କରିଛନ୍ତି । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇଛି ।
ଇଟିଭି ଭାରତ, ଭଦ୍ରକ
