ଭଦ୍ରକ: ବାସୁଦେବପୁର ଆଇସିଡିଏସ କାର୍ଯ୍ୟାଳୟର ଡ୍ରାଇଭରଙ୍କ ବକେୟା ଦରମା ପାସ କରିବାକୁ 3ହଜାର ଟଙ୍କା ନେଉଥିବାବେଳେ ଭିଜିଲାନ୍ସ ହାବୁଡ଼ରେ ଧରାପଡିଲେ ବାସୁଦେବପୁର ସିଡିପିଓ ଜାନକୀ ଦାସ । ବାସୁଦେବପୁର ଆଇସିଡିଏସ କାର୍ଯ୍ୟାଳୟରେ ଡ୍ରାଇଭର ଭାବେ ରାଜକିଶୋର ନାୟକ 2001ମସିହାରୁ ଦୈନିକ ମଜୁରୀ ଭିତ୍ତିରେ ଚାକିରୀ କରିଥିଲେ । ହେଲେ 2019 ଜୁଲାଇ ମାସରୁ ଆଜି ପର୍ଯ୍ୟନ୍ତ ଦରମା ପାଇନଥିଲେ ।
ଦରମା ପାଇଁ ଡ୍ରାଇଭର ସିଡିପିଓଙ୍କୁ ବାରମ୍ବାର ଅନୁରୋଧ କରିଥିଲେ ସୁଦ୍ଧା ତାଙ୍କୁ 40ହଜାର ଟଙ୍କା ପାସ କରିବାକୁ 3ହଜାର ଟଙ୍କା ଲାଞ୍ଚ ମାଗିଥିଲେ । ହେଲେ ସେ ଦେଇ ନପାରିବାରୁ ତାର ଦରମା ବିଲ ପାସ କରିନଥିଲେ ସିଡିପିଓ । ଫଳରେ ଡ୍ରାଇଭର ଜଣକ ଭିଜିଲାନ୍ସ ପାଖରେ ପହଞ୍ଚିଥିଲେ । ଶୁକ୍ରବାର ଅପରାହ୍ନରେ ପୂର୍ବ ପ୍ରସ୍ତୁତି ଅନୁଯାୟୀ ସିଡିପିଓ ରାଜକିଶୋରଙ୍କ ପାଖରୁ 3ହଜାର ଟଙ୍କା ଲାଞ୍ଚ ନେଉଥିବାବେଳେ ବାଲେଶ୍ବର ଓ ଭଦ୍ରକ ଭିଜିଲାନ୍ସ ମିଳିତ ଭାବେ ଚଢ଼ାଉ କରିଥିଲେ । ସିଡିପିଓଙ୍କ ନିକଟରୁ 3ହଜାର ଟଙ୍କା ଜବତ କରିବା ସହିତ ସିଡିପିଓ ବ୍ୟବହାର କରୁଥିବା ସ୍ବିଫ୍ଟ ଗାଡିକୁ ଜବତ କରିଛି ଭିଜିଲାନ୍ସ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
