ଭଦ୍ରକ: ବାବା ଆଖଣ୍ଡଳମଣିଙ୍କୁ ଦର୍ଶନ କରି ଫେରିବା ବେଳେ ଦମ୍ପତ୍ତିଙ୍କୁ ଡାକି ନେଲା କାଳ । ଭଦ୍ରକ ଜିଲ୍ଲାର ରାଣୀତାଲ ନିକଟରେ ଏଭଳି କିଛି ଦୃଶ୍ୟ ଦେଖିବାକୁ ମିଳିଛି । ବାଲେଶ୍ୱର ବାହାନଗା ସ୍ଥିତ ବାଗଲପୁର ଗ୍ରାମର ବୈକୁଣ୍ଠ ରାଉତ ଏବଂ ତାଙ୍କ ପତ୍ନୀ ଆରଡ଼ି ବାବା ଆଖଣ୍ଡଳମଣିଙ୍କୁ ଦର୍ଶନ କରି ଫେରୁଥିଲେ ।
୧୬ ନମ୍ବର ଜାତୀୟ ରାଜପଥ ଦେଇ ଏକ ସ୍କୁଟିରେ ବୈକୁଣ୍ଠ ଓ ତାଙ୍କ ପତ୍ନୀ ଯାଉଥିବା ବେଳେ ଅନ୍ୟ ଏକ ସ୍କୁଟିରେ ତାଙ୍କ ଝିଅ ଆସୁଥିଲେ । ଏହି ସମୟରେ ରାଣୀତାଲ ନିକଟରେ ଏକ କଣ୍ଟେନର୍ ବୈକୁଣ୍ଠଙ୍କ ସ୍କୁଟିକୁ ପଛପଟୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ତାଙ୍କ ପତ୍ନୀଙ୍କ ମୃତ୍ୟୁ ହୋଇଥିବା ବେଳେ ଗୁରୁତର ଅବସ୍ଥାରେ ବୈକୁଣ୍ଠଙ୍କୁ ଭଦ୍ରକ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ତେବେ ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି ।
ଏହାପରେ ସ୍ଥାନୀୟ ଲୋକ କଣ୍ଟେନରକୁ ଅଟକାଇବା ପରେ କିଛି ସମୟ ପାଇଁ ଉତ୍ତେଜନା ଦେଖାଦେଇଥିଲା । ରାଣୀତାଲ ରାସ୍ତା ଖରାପ ହୋଇ ଗୋଡ଼ି ଉଠି ରହିଛି । ଫଳରେ ଏହି ରାସ୍ତାରେ ବାରମ୍ବାର ଦୁର୍ଘଟଣା ଘଟି ଅମୂଲ୍ୟ ଜୀବନଯାଉଥିବା ଅଭିଯୋଗ ହୋଇଛି । ଯଥାଶୀଘ୍ର ରାସ୍ତା ନିର୍ମାଣ ପାଇଁ ଦାବି କରିଛନ୍ତି ସ୍ଥାନୀୟ ଲୋକ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
