ଭଦ୍ରକ: ଭଦ୍ରକ ସହରାଞ୍ଚଳରେ ପୋଲିସକୁ ଖୋଲା ଚ୍ୟାଲେଞ୍ଜ ଦେଇ ଲୁଟେରାମାନେ ଲୁଟ ଜାରି ରଖିଛନ୍ତି । ହେଲେ ଏହାକୁ ପ୍ରତିହତ କରିବା ପାଇଁ ଅସମର୍ଥ ଭଦ୍ରକ ପୋଲିସ । ଯାହାର ନଜିର ଦେଖିବାକୁ ମିଳିଛି ଭଦ୍ରକ ସହର ଅଞ୍ଚଳର ଜନଗହଳି ଅଞ୍ଚଳରେ ଥିବା ଏସବିଆଇ ମୁଖ୍ୟ ଶାଖା ସମ୍ମୁଖରେ ।
ଖବର ଅନୁଯାୟୀ, ବନ୍ତ ବୁଡ଼ା ପାଟଣା ଅଞ୍ଚଳର ଶିକ୍ଷକ ଅଶୋକ କୁମାର ଖିଲାର ଆଜି(ଗୁରୁବାର) ବ୍ୟାଙ୍କକୁ ୧୨ ଲକ୍ଷ ଟଙ୍କା ନେବା ପାଇଁ ଆସିଥିଲେ । ଆସନ୍ତାକାଲି ସେଇ ଅର୍ଥରେ ଗୋଟିଏ ଜାଗା କ୍ରୟ କରିବାର ସୂଚନା ମିଳିଛି । ତେବେ ଅଶୋକ ଏହି ୧୨ ଲକ୍ଷ ଟଙ୍କା ବ୍ୟାଙ୍କରୁ ଉଠାଇ ଆସୁଥିବାବେଳେ ପୂର୍ବ ପ୍ରସ୍ତୁତି ଅନୁଯାୟୀ, ଦୁଇ ଜଣ ଦୁର୍ବୃତ୍ତ ସେ ଟଙ୍କା ବ୍ୟାଗକୁ ଝାମ୍ପି ନେଇ ଏକ ପଲ୍ସର ବାଇକରେ ଛୁ ମାରିଥିଲେ । ସ୍ଥାନୀୟ କିଛି ଯୁବକ ଦୁର୍ବୃତ୍ତଙ୍କ ପିଛା କରି ବିଫଳ ହୋଇଥିବା ସୂଚନା ମିଳିଛି । ଏନେଇ ଖବର ପାଇଁ ଭଦ୍ରକ ସହରାଅଞ୍ଚଳ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି । ହେଲେ ଏନେଇ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ କରାଯାଇ ନାହିଁ ।
ଇଟିଭି ଭାରତ, ଭଦ୍ରକ
