ଭଦ୍ରକ: ବାସୁଦେବପୁର ଥାନା ବେତଡ଼ା ବଜାରର କାଶିଶ୍ଵର ଜୁଏଲାରୀରୁ ସୁନା ଅଳଙ୍କାର ଲୁଟ ଘଟଣା । 7 ମାସ ପରେ ଘଟଣାର ପର୍ଦ୍ଦାଫାସ କଲା ପୋଲିସ । 3 ଜଣଙ୍କୁ ଗିରଫ କରିବା ସହ ବେଳେ 30 ଲକ୍ଷ ଟଙ୍କାର ସୁନା ଅଳଙ୍କାର ଲୁଟେରାଙ୍କ ଠାରୁ ଜବତ କଲା ପୋଲିସ । ଗତ 2022 ମସିହା ସେପ୍ଟେମ୍ବର ମାସ 14 ତାରିଖ ଦିନ କାଶିଶ୍ଵର ଜୁଏଲାରୀରୁ ପ୍ରାୟ ଏକ କେଜି ଓଜନର ସୁନା ଅଳଙ୍କାର ଚୋରି ହୋଇଥିଲା ।
ମିଳିଥିବା ସୂଚନା ଅନୁଯାୟୀ ଗତବର୍ଷ ସେପ୍ଟେମ୍ବର 14 ତାରିଖ ଦିନ ଅପରାହ୍ନ ସମୟରେ ଜୁଏଲାରୀ ଦୋକାନ ମାଲିକ ତାରାକାନ୍ତ ସାହୁ ଦୋକାନ ଖୋଲି ସୁନା ଅଳଙ୍କାର ଭର୍ତ୍ତି ବ୍ୟାଗଟିକୁ ଶୋ’ କେସ ଉପରେ ରଖିଦେଇ ପାଖରେ ୱାର୍କ ସପ୍କୁ ଚାଲିଯାଇଥିଲେ । କିଛି ସମୟ ପରେ ଫେରିବା ବେଳକୁ ସୁନା ଅଳଙ୍କାର ଭର୍ତ୍ତି ବ୍ୟାଗଟି ଶୋ’ କେସ ଉପରେ ନଥିବା ଦେଖିବାକୁ ପାଇଥିଲେ । ଏହାପରେ ତୁରନ୍ତ ବାସୁଦେବପୁର ଥାନାରେ ପହଞ୍ଚି ଘଟଣା ସମ୍ପର୍କରେ ଜଣାଇବା ସହ ଲିଖିତ ଅଭିଯୋଗ କରିବା ପରେ ପୋଲିସ ଏକ ମାମଲା ରୁଜୁ କରିଥିଲା । ଘଟଣାର ତଦନ୍ତ ପାଇଁ ଭଦ୍ରକ ଜିଲ୍ଲା ଆରକ୍ଷୀ ଅଧୀକ୍ଷକଙ୍କ ନିର୍ଦ୍ଦେଶ କ୍ରମେ ଭଦ୍ରକ ଉପଖଣ୍ଡ ଆରକ୍ଷୀ ଅଧୀକ୍ଷକ ସୌରବ ଓତା , ବାସୁଦେବପୁର ଥାନା ଅଧିକାରୀ ସାବିତ୍ରୀ ପଣ୍ଡା, ଏସ୍ଆଇ ଜିତେନ୍ଦ୍ର ନାୟକ, ଲକ୍ଷ୍ମୀକାନ୍ତ ଉପାଧ୍ୟାୟଙ୍କ ସମେତ ଅନ୍ୟ କିଛି ପୋଲିସ କର୍ମଚାରୀଙ୍କୁ ନେଇ ଦୁଇଟି ସ୍ଵତନ୍ତ୍ର ଟିମ ଗଠନ କରାଯାଇ ଲୁଟେରା ମାନଙ୍କୁ ଧରିବାକୁ ଯୋଜନା ହୋଇଥିଲା । ଏହାପରେ ସିସି କ୍ୟାମେରା, ସନ୍ଧାନୀ କୁକୁର ସହାୟତାରେ ପୋଲିସ ପକ୍ଷରୁ ତଦନ୍ତକୁ ଜୋରଦାର କରାଯାଇଥିଲା ।
ତେବେ ତଦନ୍ତ ଜାରି ରହିଥିବା ବେଳେ ଘଟଣାର ସାତ ମାସ ପରେ ଲୁଟେରା ମାନେ ଗଞ୍ଜାମ ଜିଲ୍ଲା ଆସ୍କା ଥାନା ଅଞ୍ଚଳରେ ଲୁଚି ରହିଥିବା ଏକ ବିଶେଷ ସୂତ୍ରରୁ ଖବର ପାଇଥିଲା ବାସୁଦେବପୁର ଥାନା ପୋଲିସ । ଏହାପରେ ଏକ ସ୍ଵତନ୍ତ୍ର ଟିମ ଲୁଟେରା ମାନଙ୍କୁ କାବୁ କରିବା ପାଇଁ ଗଞ୍ଜାମ ଜିଲ୍ଲାରେ ପହଞ୍ଚିଥିଲା । ଶେଷରେ ଲୁଟେରା ମାନଙ୍କୁ ସେଠାରୁ କାବୁ କରିବାରେ ସଫଳ ହୋଇଥିଲେ ବାସୁଦେବପୁର ଥାନା ପୋଲିସ । ସେମାନଙ୍କ ଠାରୁ 486 ଗ୍ରାମ ଓଜନର ସ୍ଵର୍ଣ୍ଣ ଅଳଙ୍କାର, ନଗଦ 3 ଲକ୍ଷ 69 ହଜାର ଟଙ୍କା ପୋଲିସ ଜବତ କରିଥିଲା । ଜବତ ସୁନା ଅଳଙ୍କାରର ମୂଲ୍ୟ ମୂଲ୍ୟ 30 ଲକ୍ଷ ଟଙ୍କାରୁ ଊର୍ଦ୍ଧ୍ବ ହେବ ବୋଲି ସୂଚନା ମିଳିଛି ।
ତେବେ ଏହି ଲୁଟ ଘଟଣାରେ ପୋଲିସ 3 ଜଣଙ୍କୁ ଗିରଫ କରିଛି । ଗିରଫ ହୋଇଥିବା ଅଭିଯୁକ୍ତ ହେଉଛନ୍ତି ଗଞ୍ଜାମ ଜିଲ୍ଲା ଅନ୍ତର୍ଗତ ଆସ୍କା ଥାନା ଅଞ୍ଚଳର ଏମ୍. ସୁନିଲ, କୁନା ଦାସ ବୟସଏବଂ ଏ. ବାବୁ ଆଚାର୍ଯ୍ୟ । ଲୁଟ ଘଟଣାରେ ଜଡ଼ିତ ଥିବା ଅନ୍ୟ ଜଣେ ଯୁବକ ଫେରାର ଥିବା ଭଦ୍ରକ ଜିଲ୍ଲା ଆରକ୍ଷୀ ଅଧୀକ୍ଷକ ବରୁଣ ଗୁଣ୍ଡୁପାଲି ସୂଚନା ଦେଇଛନ୍ତି ।
ଇଟିଭି ଭାରତ, ଭଦ୍ରକ
