ଭଦ୍ରକ: ବନ୍ତ ଛକ ପରେ ଭଦ୍ରକ ବାଇପାସ ଠାରେ ସ୍ପଷ୍ଟ ଦିବାଲୋକରେ ପୁଣି ଲୁଟ ହୋଇଛି । ପୋଲିସକୁ ଚ୍ୟାଲେଞ୍ଜ ଦେଇ ଲୁଟେରା କରୁଛନ୍ତି ଲୁଟ । ହେଲେ ଲୁଟେରାଙ୍କ ସୁରାକ ପାଉନାହିଁ ପୋଲିସ । ଯାହାକି ପୋଲିସର ନିଦ ହଜାଇ ଦେଇଛି । ଖବର ଅନୁଯାୟୀ ଭଦ୍ରକ ସହର ବାଇପାସ ଜଗନ୍ନାଥ ମନ୍ଦିର ନିକଟରେ ଲୁଟ ହୋଇଥିବା ଜଣା ପଡ଼ିଛି । ସହରର ଗୋପବନ୍ଧୁ ନଗରରେ ରହୁଥିବା ସସ୍ମିତା ସୁତାର ଝିଅକୁ ଟିଉସନରୁ ନେବାକୁ ଆସିଥିବା ବେଳେ ଦୁଇ ଜଣ ଲୁଟେରା ବାଇକରେ ଆସି ମହିଳାଙ୍କ ବେକରୁ ସୁନା ଚେନ ଝାମ୍ପି ପଳାଇଛନ୍ତି । ଭଦ୍ରକ ଟାଉନ ଥାନା ଅନ୍ତର୍ଗତ ବାଇପାସ ଜଗନ୍ନାଥ ମନ୍ଦିର ନିକଟରେ ଏହି ଘଟଣା ଘଟିଛି । ଯାହାର ସ୍ପଷ୍ଟ ଚିତ୍ର ସିସିଟିଭିରେ କଏଦ ହୋଇଛି ।
ପରେ ମହିଳା ଜଣକ ଭଦ୍ରକ ଟାଉନ ଥାନାରେ ଏତଲା ଦେଇଛନ୍ତି । ପୋଲିସ ପହଞ୍ଚି ଛାନଭିନ ଆରମ୍ଭ କରିଛି । ତେବେ ସିସିଟିଭିରେ କଏଦ ହୋଇଥିବା ଏହି ଲୁଟ ଘଟଣାର ସମସ୍ତ ଚିତ୍ରକୁ ଭିତ୍ତି କରି ପୋଲିସ ତଦନ୍ତ ଆରମ୍ଭ କରିଥିବା ଜଣାପଡିଛି । ହେଲେ ଏନେଇ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ କରାଯାଇ ନାହିଁ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
