ଭଦ୍ରକ: ରାସ୍ତାକଡରେ ଗାଡିର ନମ୍ବର ପ୍ଲେଟରେ ଷ୍ଟିକରିଂ କରୁଥିଲେ । ହଠାତ୍ କେନ୍ଦ୍ର ସରକାର ନୂତନ ହାଇ ସିକ୍ୟୁରିଟି ନମ୍ବର ପ୍ଲେଟ ବାଧ୍ୟତାମୂଳକ ନିୟମ ବ୍ୟବସାୟ ବନ୍ଦ କରିଦେଲା । ରୋଜଗାରଶୂନ୍ୟ ହୋଇ ଚିନ୍ତାରେ ପଡିଗଲେ ସମସ୍ତ ରାସ୍ତାକଡର ଷ୍ଟିକରିଂ ଦୋକାନୀ । ଏଠି କିନ୍ତୁ ଭିନ୍ନ କଥା ଦେଖିବାକୁ ମିଳିଥିଲା ସନ୍ତୋଷଙ୍କ କ୍ଷେତ୍ରରେ । ସରକାରଙ୍କ ଏଭଳି ଘୋଷଣା ପରେ ସେ ପ୍ରଥମେ ଚିନ୍ତାରେ ପଡିଯାଇଥିଲେ । ପରବର୍ତ୍ତୀ ସମୟରେ ନିଜର କଳାର ବିନିଯୋଗ କରି ୟୁଟ୍ୟୁବ ଚ୍ୟାନେଲ କଲେ । 6 ମାସ ମଧ୍ୟରେ 2.1 ମିଲିୟନରେ ପହଞ୍ଚିଥିଲା ସବକ୍ରିପସନ । ରୋଜଗାର ଧିରେ ଧିରେ ବଢିଲା । ପ୍ରଥମେ 20 ହଜାରରୁ ଆରମ୍ଭ ହୋଇ ଆଜି ମାସକୁ ଲକ୍ଷାଧିକ ଟଙ୍କାରେ ପହଞ୍ଚିଲାଣି । ଯାହା ସେ କେବେ ଭାବିନଥିଲେ ।
ଭଦ୍ରକ ସହର ନିକଟ ଜାନୁଗଞ୍ଜରେ ରୁହନ୍ତି ସନ୍ତୋଷ ମହାରଣା । ବାପା ଗୌରାଙ୍ଗ ମହାରଣା ଜଣେ କାଠ ମିସ୍ତ୍ରୀ । ସନ୍ତୋଷଙ୍କର କଳା ପ୍ରତି ଆଗ୍ରହ ଥିଲା । ପରେ ସେ ଭଦ୍ରକ ଆର୍ଟ କଲେଜରେ ନାମ ଲେଖାଇଲେ । ସେଠାରୁ ବ୍ୟାଚଲର ଅଫ ଭିଜୁଆଲ ଆର୍ଟ୍ସ ପାସ କରିବା ପରେ ରୋଜଗାର ନପାଇ ଚାରିଘରିଆ ଛକରେ ଦୋକନ ଟିଏ କରି ଗାଡିର ନମ୍ବର ପ୍ଲେଟରେ ଷ୍ଟିକରିଂ କରିବା ସହ ଅନ୍ୟାନ୍ୟ ଷ୍ଟିକରିଂ କାମ କଲେ । ଏହି ସମୟରେ କଲେଜର ଜଣେ ସହପାଠୀଙ୍କ ସହ ପ୍ରେମ ବିବାହ ମଧ୍ୟ କଲେ । ପରିବାର ମଧ୍ୟ ବଢିଲା, ହେଲେ ରୋଜଗାର ବଢିଲା ନାହିଁ । ହଠାତ୍ କେନ୍ଦ୍ର ସରକାର ହାଇ ସିକ୍ୟୁରିଟି ନମ୍ବର ପ୍ଲେଟ ଲାଗୁ କରିଦେଲେ । ଏହାକୁ ନେଇ ଚିନ୍ତାରେ ପଡିଗଲେ ସମସ୍ତ ଦୋକାନୀ । ସନ୍ତୋଷ ନିଜ ରୋଜଗାର ହରାଇ ୟୁଟ୍ୟୁବ ଚ୍ୟାନେଲଟେ ପ୍ରସ୍ତୁତ କଲେ। ଏଥିରେ ପତ୍ନୀ ସତ୍ୟଭାମା ମଧ୍ୟ ତାଙ୍କୁ ସହଯୋଗ କଲେ ।
SMB Art & Craft ନାମରେ ଚ୍ୟାନେଲ ଚଳାଇଲେ ଏହି ଦମ୍ପତି । ଜାତୀୟ ପତାକାକୁ ଭିନ୍ନ ଭିନ୍ନ ଡିଜାଇନରେ ପ୍ରସ୍ତୁତ କରି ୟୁଟ୍ୟୁବ ଚ୍ୟାନେଲରେ ଅପଲୋଡ କଲେ । ସ୍ତ୍ରୀ ସତ୍ୟଭାମା ମଧ୍ୟ ସମାନ ପାଠ ପଢିଥିବାରୁ ସନ୍ତୋଷଙ୍କୁ ସହଯୋଗ ମଧ୍ୟ ମିଳିଲା । ଧିରେ ଧିରେ ୟୁଟ୍ୟୁବର ସବସ୍କ୍ରାଇବର ମଧ୍ୟ ବଢି ବଢି ଚାଲିଲା । ପ୍ରଥମେ କାର୍ଡ ବୋର୍ଡରେ, ପରେ ପରେ ଚାଉଳରେ, ପ୍ଲାଷ୍ଟିକ ଚାମଚରେ, ଆଇସ୍କ୍ରିମ ଚାମଚରେ, ଉଲରେ, ତୁଳାରେ ଜାତୀୟ ପତାକା ତିଆରି କରିବା ସହ ଏହା ପ୍ରଣାଳୀ ଗୁଡିକ ମଧ୍ୟ ଅପଲୋଡ କଲେ । ୟୁଟ୍ୟୁବରେ ଫେବୃୟାରୀ ମାସରେ ଆରମ୍ଭ କରିଥିବା ବେଳେ ତାହା ଭିୟୁର୍ସ ବଢିବା ସହିତ ଏପ୍ରିଲ ମାସରେ ମନିଟାଇଇଜେସନ ହୋଇଗଲା । ରୋଜଗାର ପନ୍ଥା ମଧ୍ୟ ବଢିଲା । ପ୍ରଥମରେ ବିଶ୍ବାସ ହେଉ ନଥିବା ବେଳେ ଧିରେ ଧିରେ ରୋଜଗାର ବଢିବା ସହିତ ଦୁହେଁ ମିଶି ନିଜ ପାଠରେ ବିନିଯୋଗ କରିବା ସହ ଭଳି କି ଭଳି ଡିଜାଇନରେ ଭାରତର ଜାତୀୟ ପତାକା ତିଆରି କରି ଅପଲେୋଡ କଲେ । ଭିୟୁର୍ସ ବଢିଲା, ରୋଜଗାର ମଧ୍ୟ ବଢିଲା । ୟୁ-ଟ୍ୟୁବ ତାଙ୍କୁ ଗୋଲ୍ଟ ଓ ସିଲଭର ମେଡାଲ ମଧ୍ୟ ଦେଲା । ରୋଜଗାର ଆସି ଲକ୍ଷେ ଟଙ୍କାରେ ପହଞ୍ଚିଲା। ଯାହାକୁ ନେଇ ପରିବାର ଲୋକେ ବେଶ ଖୁସିରେ ଏବେ ।
କଲେଜରେ ପଢିବା ବେଳେ ଦୋକାନ କରି ନିଜର ପାଠପଢା ଖର୍ଚ୍ଚ ବହନ କରିବା ସହ ଘରର ସମସ୍ତ ଖର୍ଚ୍ଚ ବହନ କରୁଥିବା ସନ୍ତୋଷ ମଝିରେ ହତୋତ୍ସାହିତ ହେବା ସହ ନିରୂପାୟ ହୋଇ ପଡିଥିଲେ । ଗୋଟିଏ ପଟରେ ପାଠ ଖର୍ଚ୍ଚ ଅନ୍ୟ ପଟରେ ପରିବାର ପ୍ରତି ପୋଷଣ ଉଭୟଙ୍କୁ ସମାନ୍ତରାଳ ଭାବରେ ଚଳାଇବା ତାଙ୍କ ପକ୍ଷରେ ସମ୍ଭବ ନଥିଲା । ସ୍ବାମୀ ଓ ସ୍ତ୍ରୀ ଦୁହେଁ ନିଜର ଶିକ୍ଷାର ସଦୁପଯୋଗ କରି ମାସକୁ ଲକ୍ଷାଧିକ ଟଙ୍କା ରୋଜଗାର କରିବା ସହ ଏହାକୁ ତ୍ବାରାନ୍ବିତ କରି ଆଗକୁ ବଢାଇବା ପାଇଁ ସଫଳ ଉଦ୍ୟମ ଜାରି ରଖିଛନ୍ତି । ଏହା ତାଙ୍କ ପରିବାର ଲୋକଙ୍କ ମନରେ ମଧ୍ୟ ନୂତନ ଆଶା ସୃଷ୍ଟି କରିଛି । ସନ୍ତୋଷଙ୍କ ଏଭଳି କାର୍ଯ୍ୟ ଏବେ ଯୁବ ସମାଜ ପାଇଁ ପ୍ରେରଣା ପାଲଟିଛି ବୋଲି କହିଛନ୍ତି ସ୍ଥାନୀୟ ଯୁବପିଢି ଏବଂ କଲେଜରେ ପାଠ ପଢୁଥିବା ଛାତ୍ରଛାତ୍ରୀ ।
ଇଟିଭି ଭାରତ, ଭଦ୍ରକ
