ରାଜନୈତିକ ଆକ୍ରୋଶରୁ ବସ୍ତି ଉଚ୍ଛେଦ ! ଜିଲ୍ଲାପାଳଙ୍କୁ ଭେଟିଲେ ବସ୍ତି ବାସିନ୍ଦା

ରାଜନୈତିକ ଆକ୍ରୋଶକୁ ନେଇ ଉନ୍ନୟନମୂଳକ ଯୋଜନା ଆଳରେ ବସ୍ତି ବାସିନ୍ଦାଙ୍କୁ ଉଚ୍ଛେଦ ଅଭିଯୋଗ । ଜିଲ୍ଲାପାଳଙ୍କୁ ଭେଟି ଦାବି ପତ୍ର ଦେଲେ ବସ୍ତିବାସିନ୍ଦା । ଉଚ୍ଛେଦ ପୂର୍ବରୁ ଥଇଥାନ କରିବାକୁ ଦାବି । ଅଧିକ ପଢ଼ନ୍ତୁ

ଭଦ୍ରକ: ରାଜନୈତିକ ଆକ୍ରୋଶକୁ ନେଇ ଉନ୍ନୟନମୂଳକ ଯୋଜନା ଆଳରେ ବସ୍ତି ବାସିନ୍ଦାଙ୍କୁ ଉଚ୍ଛେଦ ଅଭିଯୋଗ । ଏମିତି ଏକ ଅଭିଯୋଗ ନେଇ ଭଦ୍ରକ ଜିଲ୍ଲାପାଳଙ୍କୁ ଭେଟିଛନ୍ତି ଭଦ୍ରକ ପୌରାଞ୍ଚଳ ଅନ୍ତର୍ଗତ 17 ନମ୍ବର ୱାର୍ଡ ଚନ୍ଦନ ବଜାର ସ୍ଥିତ ବୁଧବାର ହାଟରେ ବସବାସ କରୁଥିବା କିଛି ପଛୁଆ ବର୍ଗର ବସ୍ତି ବାସିନ୍ଦାମାନେ । ପିଢି ପିଢି ଧରି ସେଠାରେ ରହିଆସୁଥିବା ବେଳେ ତାଙ୍କୁ ଉଚ୍ଛେଦ କରାଗଲେ ସେମାନେ କେଉଁଠି ରହିବେ ବୋଲି ପ୍ରଶ୍ନ କରିଛନ୍ତି । ତାଙ୍କ ଥଇଥାନ ନିମନ୍ତେ ବ୍ୟବସ୍ଥା କରିବା ପାଇଁ ଜିଲ୍ଲାପାଳଙ୍କୁ ନିକଟରେ ଅନୁରୋଧ କରିଛନ୍ତି ।

ସୂଚନା ଅନୁଯାୟୀ, ବର୍ଷ ବର୍ଷ ଧରି ଭଦ୍ରକ ପୌରାଞ୍ଚଳ ଅନ୍ତର୍ଗତ 17 ନମ୍ବର ୱାର୍ଡ ଚନ୍ଦନ ବଜାର ସ୍ଥିତ ବୁଧବାର ହାଟରେ ରହିଆସୁଛନ୍ତି ଗରିବ, ଖଟିଖିଆ, ଦଳିତ ତଥା ଭୂମିହୀନ ଶ୍ରେଣୀର ପାଖାପାଖି 14 ପରିବାରର ଲୋକମାନେ । ଏଥିପାଇଁ ସେମାନେ ସରକାରଙ୍କୁ ଟିକସ ମଧ୍ୟ ଦେଉଛନ୍ତି । ତେବେ ସେଠାରେ ପୌରପାଳିକା ପକ୍ଷରୁ କୌଣସି ଉନ୍ନୟନମୂଳକ ଯୋଜନା କରାଯିବା ନେଇ ଏହି ବସ୍ତି ବାସିନ୍ଦାମାନଙ୍କୁ ଉଚ୍ଛେଦ କରିବା ପାଇଁ ପୌରପାଳିକା ପକ୍ଷରୁ ନୋଟିସ ଜାରି କରାଯାଇଥିବା ଜଣାପଡିଛି ।

ଫଳରେ ଉକ୍ତ ସରକାରୀ ଜମିରେ ଖଜଣା ଦେଇ ଦୀର୍ଘ ପିଢ଼ି ପିଢ଼ି ଧରି ବସବାସ କରୁଥିବା ଲୋକମାନଙ୍କ ମୁଣ୍ଡ ଉପରେ ଏବେ ଚଡ଼କ ପଡିଛି । ଶୀତ ଋତୁ ସମୟରେ ଗୃହ ଉଚ୍ଛେଦ ହେଲେ ଆମେ କେଉଁଠି ରହିବୁ ବୋଲି ପ୍ରଶ୍ନ କରିଛନ୍ତି ବସ୍ତିବାସିନ୍ଦା । ଅନ୍ୟପଟେ ବସ୍ତିରେ କେଉଁକାର୍ଯ୍ୟ ହେବ ତାହା ସଠିକ ଭାବରେ କୁହାଯାଉନଥିବା ବେଳେ ଏଠାରେ ରାଜନୈତିକ ଆକ୍ରୋଶ ରଖି ବସ୍ତିବାସିନ୍ଦାଙ୍କୁ ଜାଣି ଶୁଣି ହଇରାଣ କରାଯାଉଥିବା ଅଭିଯୋଗ ଆଣିଛନ୍ତି ବିଶ୍ୱହିନ୍ଦୁ ପରିଷଦ ପ୍ରାନ୍ତ ପ୍ରଚାର ପ୍ରମୁଖ ମାନସ ରଞ୍ଜନ ମହାନ୍ତି ।

ଏହି ଉଚ୍ଛେଦ କରିବା ପୂର୍ବରୁ ରାଜ୍ୟ ସରକାରଙ୍କ ଥଇଥାନ ନିୟମ ମୁତାବକ ଉପଯୁକ୍ତ ସ୍ଥାନ ନିରୂପଣ କରି ବାସଗୃହ ନିର୍ମାଣ କରାଇବା ପର୍ଯ୍ୟନ୍ତ ସେମାନଙ୍କୁ ସମୟ ଦେବାକୁ ଜିଲ୍ଲାପାଳ ଙ୍କୁ ଅନୁରୋଧ କରିଛନ୍ତି ଏହି ଭୂମିହୀନ ମାନେ । ଏହିପରି ସ୍ଥଳେ ଘର ଉଚ୍ଛେଦ ପାଇଁ ପୌରପାଳିକା ନେଇଥିବା ନିଷ୍ପତ୍ତିକୁ ତୁରନ୍ତ ବନ୍ଦ କରିବା, ପୌରପାଳିକା ମଧ୍ୟରେ ଏକ ସରକାରୀ ଜମିରେ ଜମି ଚିହ୍ନଟ ଓ ଗୃହ ନିର୍ମାଣ କରାଇବାର ସୁବ୍ୟବସ୍ଥା କରିବା ପାଇଁ ଦାବି ହୋଇଛି।

ଇଟିଭି ଭାରତ, ଭଦ୍ରକ