ଭଦ୍ରକ: ବିକାଶର ନଗ୍ନ ଚିତ୍ର । ଭଦ୍ରକ ଜିଲ୍ଲା ବାସୁଦେବପୁର ନିର୍ବାଚନ ମଣ୍ଡଳୀ ତଥା ତିହିଡି ବ୍ଲକ ବାହାବଳପୁର ପଞ୍ଚାୟତ ଅଧିନ ପୋଖରୀସାହି ଗାଁ, ଯେଉଁଠି ରୋଗୀଙ୍କୁ ଖଟିଆରେ ବୋହିନେବା ଏକ ନିତିଦିନିଆ ଘଟଣା । ନିର୍ବାଚନ ପୂର୍ବରୁ ସ୍ଥାୟୀ ରାସ୍ତା ନିର୍ମାଣ କରାଇ ଦେବାଲାଗି ପ୍ରତିଶୃତି ମିଳିଥାଏ ହେଲେ, ପରବର୍ତ୍ତୀ ପର୍ଯ୍ୟାୟରେ କାହାରି ଦର୍ଶନ ମିଳେନା ।
ତେବେ ଗତକାଲି(ଶୁକ୍ରବାର) ଜଣେ ପ୍ରସୂତୀ ମହିଳା ଯନ୍ତ୍ରଣା ଅନୁଭବ କରିବା ପରେ ତାଙ୍କୁ ମେଡିକାଲକୁ ନେବା ଲାଗି କବାଟ ପଟାରେ ଝୁଲା କରି ନେଇଯାଇଥିଲେ କିଛି ଯୁବକ । କାଦୁଅ ପଚ ପଚ ରାସ୍ତାରେ ପ୍ରାୟ 10 ଜଣ ଯୁବକ ଏକ ଖଟିଆରେ ବୋହି ନେଉଥିଲେ ମହିଳାଙ୍କୁ । ଯାହାର ଭିଡିଓ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି ।
ଏପଟେ ଅଞ୍ଚଳବାସୀ ବାରମ୍ବାର ଏହି ଅସୁବିଧାର ସମ୍ମୁଖୀନ ହେଉଥିଲେ ସୁଦ୍ଧା ନିଦାବିଷ୍ଣୁ ସାଜିଛନ୍ତି ପ୍ରଶାସନିକ ଅଧିକାରୀ ଓ ସ୍ଥାନୀୟ ରାଜନେତା । ତେବେ ଏନେଇ କୌଣସି ପ୍ରଶାସନିକ ଅଧିକାରୀ କି ରାଜନେତା କୌଣସି ପ୍ରତିକ୍ରିୟା ପ୍ରକାଶ କରିନାହାନ୍ତି।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
