ଭଦ୍ରକ: ପୁରୁଣା ବଜାର ଥାନା ମିର୍ଜାପୁର ଅଞ୍ଚଳରେ ଅବକାରୀ ବିଭାଗ କର୍ମଚାରୀଙ୍କୁ ମଦ ମାଫିଆଙ୍କ ଆକ୍ରମଣ ଘଟଣାରେ ଆଉ 2 ଜଣ ଅଭିଯୁକ୍ତଙ୍କୁ ଗିରଫ କଲା ପୁରୁଣାବଜାର ଥାନା ପୋଲିସ । ପୁର୍ବରୁ ଅନ୍ୟ 3 ଅଭିଯୁକ୍ତଙ୍କୁ ଗିରଫ କରିଥିଲା ଭଦ୍ରକ ପୁରୁଣା ବଜାର ଥାନା ପୁଲିସ।
ଖବର ଅନୁଯାୟୀ ଚଳିତ ମାସ 7 ତାରିଖ ଦିନ ପୁରୁଣା ବଜାର ଥାନା ମିର୍ଜାପୁର ଅଞ୍ଚଳରେ ଅବକାରୀ ବିଭାଗ ପକ୍ଷରୁ ଚଢାଉ କରାଯାଇ ବିପୁଳ ପରିମାଣର ମଦ ସହ 2 ଜଣଙ୍କୁ ଗିରଫ କରିଥିଲା । ହେଲେ ମଦମାଫିଆଙ୍କ ପାଲଟା ଆକ୍ରମଣର ଶିକାର ହୋଇଥିଲେ ଅବକାରୀ ବିଭାଗର ଅଧିକାରୀ । ଆକ୍ରମଣ କରିବା ସହ ଜବତ ମଦକୁ ବି ଛଡାଇ ନେଇଥିଲେ ଦୁର୍ବୃତ୍ତ । ପରେ ଥାନାରେ ଅଭିଯୋଗ ହେବା ପରେ ପୋଲିସ ପକ୍ଷରୁ ବିଭିନ୍ନ ସ୍ଥାନରେ ଚଢାଉ କରାଯାଇଥିଲା ।
ପ୍ରଥମେ 3 ଜଣ ଅଭିଯୁକ୍ତଙ୍କୁ ଗିରଫ କରିଥିବା ବେଳେ ଆଜି ଅନ୍ୟ 2 ଜଣ ଅଭିଯୁକ୍ତଙ୍କୁ ଗିରଫ କରିଛି ପୁଲିସ। ଏହି ଦୁଇ ଅଭିଯୁକ୍ତଙ୍କ ନାଁ ନିତ୍ୟାନନ୍ଦ ବେହେରା ଓ କୈଳାଶ ବେହେରା ବୋଲି ଜଣାପଡିଛି। ତେବେ ପୂର୍ବରୁ ଗିରଫ ହୋଇଥିବା ଅଭିଯୁକ୍ତ ମାନେ ହେଲେ ତପନ ବେହେରା, ଆମର ବେହେରା ଓ ଦୀପକ ବେହେରା ବୋଲି ପୋଲିସ କହିଛି ।
ଭଦ୍ରକରୁ ଦେବାଶିସଷ ମହାପାତ୍ର, ଇଟିଭି ଭାରତ
