ଭଦ୍ରକ: ଆଉ ମାତ୍ର ଗୋଟିଏ ଦିନ । ସରିବ ଶେଷ ପର୍ଯ୍ୟାୟ ନାମାଙ୍କନ ଦାଖଲ । ଏଥିପାଇଁ ଚଳଚଞ୍ଚଳ ଭଦ୍ରକ ରାଜନୀତି । ଜିଲ୍ଲାରେ ଆଜି ଦେଖାଦେଇଥିଲା ଉତ୍ସବର ମାହୋଲ । କାରଣ ନାମାଙ୍କନ ଭରିଥିଲେ ହେଭିୱେଟ୍ ନେତା ।
ବିରାଟ ଶୋଭାଯାତ୍ରାରେ ଆସି ଦଳୀୟ ପ୍ରାର୍ଥୀ ଦାଖଲ କରିଥିଲେ ପ୍ରାର୍ଥୀପତ୍ର । ସମର୍ଥକ ସହ ଆସି ନିଜ ଶକ୍ତି ପ୍ରଦର୍ଶନ କରିଥିଲେ ରାଜନେତା । ଏହି ତାଲିକାରେ ସର୍ବପ୍ରଥମେ ଅଛି କଂଗ୍ରେସ । ଦଳ ହାଇପ୍ରୋଫାଇଲ ନେତାଙ୍କ ମଧ୍ୟରେ ପିସିସି ସଭାପତି ନିରଞ୍ଜନ ପଟ୍ଟନାୟକ, ନଳିନୀକାନ୍ତ ମହାନ୍ତି ଏବଂ ବିଦ୍ୟାଧର ଜେନା ଭରିଥିଲେ ନାମାଙ୍କନ । ଶାସକ ଦଳର ବିଫଳତାକୁ ମୁଦ୍ଦା କରିଛନ୍ତି ଦଳୀୟ ପ୍ରାର୍ଥୀ । ଅନ୍ୟପକ୍ଷରେ ବିଜେଡିର ଭଦ୍ରକ ବିଧାୟକ ପ୍ରାର୍ଥୀ ସଞ୍ଜୀବ ମଲ୍ଲିକ ମଧ୍ୟ ନିଜ ସମର୍ଥକଙ୍କ ସହ ପ୍ରାର୍ଥୀପତ୍ର ଦାଖଲ କରିଥିଲେ ।
ସେହିପରି ବିଜେପି ପକ୍ଷରୁ ନାମାଙ୍କନ ଭରିଥିଲେ 3 ହେଭିୱେଟ । ଧାମନଗର ପାଇଁ ରାଜ୍ୟ ଉପସଭାପତି ବିଷ୍ଣୁ ସେଠୀ, ଭଣ୍ଡାରୀପୋଖରୀ ପାଇଁ ଜିଲ୍ଲା ସଭାପତି ବଦ୍ରିନାରାୟଣ ଧଳ ଏବଂ ଭଦ୍ରକ ବିଧାୟକ ପ୍ରାର୍ଥୀ ଭାବେ ପ୍ରାର୍ଥୀପତ୍ର ଦାଖଲ କରିଥିଲେ ପ୍ରଦୀପ ନାୟକ । ଆଗାମୀ ନିର୍ବାଚନରେ ବିଜେପି ସରକାର । ଏହିପରି କିଛି ଦୃଢୋକ୍ତି ସ୍ପଷ୍ଟ ବାରି ହେଉଥିଲା ଦଳୀୟ ପ୍ରାର୍ଥୀ ଓ ସମର୍ଥକଙ୍କ ମୁହଁରେ ।
ପ୍ରମୁଖ ନେତାଙ୍କ ଗସ୍ତକୁ ନେଇ ଜିଲ୍ଲା ପାଣିପାଗରେ ଭରିଛି ଉଷ୍ମତା । ଉତ୍ସାହିତ ହୋଇଉଠିଛନ୍ତି କର୍ମୀ, ତତ୍ପର ହୋଇଛି ଜିଲ୍ଲା ପ୍ରଶାସନ । ଏବେ କେବଳ ଅପେକ୍ଷା ମତଦାନ ତାରିଖକୁ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
