ଭଦ୍ରକ: ପୁଅର ଆକୁଳ ଚିତ୍କାର ଶୁଣି ସମ୍ଭାଳି ପାରଲାନି ମା' । ପୁଅକୁ ବଞ୍ଚାଇକୁ ଯାଇ ଚାଲିଗଲା ମା'ର ଜୀବନ । କିନ୍ତୁ ପୁଅକୁ ମଧ୍ୟ ବଞ୍ଚାଇ ପାରିଲା ନାହିଁ ମା' । ବିଦ୍ୟୁତ୍ ସଂସ୍ପର୍ଶରେ ଆସିବା ପରେ ମା' ଓ ପୁଅର ମୃତ୍ୟୁ ହୋଇଛି । ଏଭଳି ଦୁଃଖଦ ଘଟଣା ଘଟିଛି ଭଦ୍ରକ ସାନକୃଷ୍ଣପୁର ପଞ୍ଚାୟତର ନଟିଆପାଳ ଗାଁରେ । ମୃତ ମହିଳା ହେଉଛନ୍ତି ଲକ୍ଷ୍ମୀମଣି ନାୟକ ଓ ପୁଅ ସପନ ।
ସୂଚନା ଅନୁଯାୟୀ ଗତକାଲି ମା' ଘର ପଛପଟ ବାଡିରେ କାମ କରୁଥିବା ବେଳେ ପୁଅ ସପନକୁ ବିଦ୍ୟୁତ ଚାଳିତ ମୋଟର ଚଲାଇବାକୁ କହିଥିଲେ। ହେଲେ କିଏ ଜାଣିଥିଲା ଏହି ଗାଡି ହିଁ କାଳ ପାଲଟିବ ଉଭୟଙ୍କ ପାଇଁ । ସପନ ମୋଟର ପ୍ଲକ୍ ଦେବା ସମୟରେ କୌଣସି କାରଣରୁ ବିଦ୍ୟୁତ ସଂଯୋଗରେ ଆସିଯାଇଥିଲେ । ଫଳରେ ପୁଅର ଚିତ୍କାର ଶୁଣି ମାଆ ଲକ୍ଷ୍ମୀମଣି ଦୌଡି ପୁଅର ହାତକୁ ଟାଣି ଆଣିବାକୁ ଚେଷ୍ଟା କରିଥିଲେ।
ଏହାପରେ ଉଭୟ ବିଦ୍ୟୁତ ଆଘାତରେ ଛିଟିକି ପଡିଥିଲେ । ପରିବାର ଲୋକେ ଉଭୟଙ୍କୁ ବାସୁଦେବପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିବା ବେଳେ ଡାକ୍ତର ମୃତ ଘୋଷଣା କରିଥିଲେ । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
