ଭଦ୍ରକ: ଭଦ୍ରକ ଏସପିଙ୍କ କାର୍ଯ୍ୟାଳୟ ଆଗରେ ଆତ୍ମାହୁତି ଉଦ୍ୟମ । ନ୍ୟାୟ ପାଇଁ ଦୌଡି ଦୌଡି ନୟାନ୍ତ ପରେ ନିଜ ଦେହରେ କିରୋସିନ ଢାଳି ଆତ୍ମାହୁତି ଉଦ୍ୟମ କରିଛନ୍ତି ମା' ଓ ପୁଅ ।
ମାଆ ଓ ପୁଅ ହେଉଛନ୍ତି ଭଦ୍ରକ ଜିଲ୍ଲା ଗ୍ରାମାଞ୍ଚଳ ଥାନା ଗଣିଜାଙ୍ଗ ଅଞ୍ଚଳର ପଞ୍ଚାନନ ପାତ୍ର ଓ ଜୋସନାରାଣୀ ପାତ୍ର । ଜମିବାଡ଼ି ବିବାଦ ନେଇ ପୂର୍ବରୁ ଥାନାରେ ଅଭିଯୋଗ କରିଥିଲେ । ତାଙ୍କ ଜମି ଜବରଦଖଲ ହୋଇଥିବା ନେଇ ପୋଲିସ , ତହସିଲଦାର , ଜିଲ୍ଲାପାଳଙ୍କ ନିକଟରେ ବହୁ ଥର ଅଭିଯୋଗ ମଧ୍ୟ କରିଥିଲେ । ଏପରିକି କୋର୍ଟର ଦ୍ବାରସ୍ଥ ମଧ୍ୟ ହୋଇଥିଲେ । ହେଲେ ଜବରଦଖଲକାରୀ ନିୟମକୁ ମାନି ନଥିଲେ । ଏନେଇ ଉଭୟ ମାଆ ଓ ପୁଅ ପୁଣି ଗ୍ରାମାଞ୍ଚଳ ଥାନାର ଆଶ୍ରୟ ନେବା ସହ ଭଦ୍ରକ ଏସପିଙ୍କୁ ଭେଟିଥିଲେ ।
ଏସପିଙ୍କ କାର୍ଯ୍ୟାନୁଷ୍ଠାନ ପ୍ରତିଶୃତି ପରେ ମଧ୍ୟ ଜବରଦଖଲକାରୀ କୌଣସି ଭୁକ୍ଷେପ କରିନଥିଲେ । ଶେଷରେ ମା ଓ ପୁଅ ଭଦ୍ରକ ଏସପିଙ୍କୁ ଭେଟିବା ସହ କୌଣସି ସଠିକ ଉତ୍ତର ନପାଇବାରୁ ଏସପିଙ୍କ କାର୍ଯ୍ୟାଳୟ ସମ୍ମୁଖରେ କିରୋସିନ ଢାଳି ହେବା ବେଳେ ପୋଲିସ କର୍ମୀମାନେ ତାଙ୍କୁ ଉଦ୍ଧାର କରିଛନ୍ତି । ତେବେ ଏନେଇ ପୋଲିସ କୌଣସି ପ୍ରତିକ୍ରିୟା ଦେଇନାହିଁ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
