ଭଦ୍ରକ: ବିଶ୍ବବ୍ୟାପୀ ଏବେ କୋରୋନାର ଭୟଭୟତା ଜାରି ରହିଛି । ଏଭଳି ସ୍ଥିତିରେ ରାଜ୍ୟରେ ରକ୍ତଦାନ ହ୍ରାସ ପାଇଥିବାରୁ ଅନେକ ଜଟିଳ ରୋଗ ନିଦାନ କ୍ଷେତ୍ରରେ ରକ୍ତ ପ୍ରତିବନ୍ଧକ ସାଜିଛି । ଏହି ସଙ୍କଟକୁ ଦୂର କରିବାକୁ 'ଓଡିଶା ମୋ ପରିବାର' ଏହି ମିଶନକୁ ନିଜ ହାତକୁ ନେଇଛି । ଏଥିସହ ଏହି ଶିବିର ଜରିଆରେ ପ୍ଲାଜମା ମଧ୍ୟ ସଂଗ୍ରହ କରିବାକୁ ଲକ୍ଷ୍ୟ ରଖାଯାଇଛି । ରବିବାର କ୍ରାନ୍ତି ଦିବସ ଅବସରରେ ଭଦ୍ରକରେ ରକ୍ତଦାନ ଶିବିର ଉଦଘାଟନ କରାଯାଇଛି ।
ଅପରପକ୍ଷେ ଓଡିଶାରେ କୋରୋନା ସଂକ୍ରମିତଙ୍କ ପାଇଁ ପ୍ଲାଜମା ଥେରାପି ମଧ୍ୟ ଏକପ୍ରକାର ବରଦାନ ପ୍ରମାଣିତ ହୋଇଛି । କୋରନା ଆକ୍ରାନ୍ତମାନେ ସୁସ୍ଥ ହେବା ପରେ ସେମାନଙ୍କୁ ପ୍ଲାଜମା ଦାନ କରିବା ପାଇଁ ନିବେଦନ କରାଯାଉଛି । ରାଜ୍ୟ ସରକାର ଓ ଜିଲ୍ଲା ପ୍ରଶାସନ ମଧ୍ୟ ପ୍ଲାଜମା ଦାନ କରିବାକୁ ଜନତାଙ୍କୁ ସଚେତନ କରୁଛି । ଏହି ଶିବିରରେ ରକ୍ତ ଦାନ ସହ କିପରି ଅଧିକରୁ ଅଧିକ ପ୍ଲାଜମା ଦାନ କରାଯାଇପାରିବ ସେ ନେଇ ପ୍ରଚେଷ୍ଟା ଜାରି ରହିଛି ବୋଲି ଭଦ୍ରକ ବିଧାୟକ ସଞ୍ଜୀବ ମଲ୍ଲିକ କହିଛନ୍ତି ।
ଏହି ଶିବିରକୁ ଭଦ୍ରକ ସାଂସଦ ମଞ୍ଜୁଲତା ମଣ୍ଡଳ ଉଦଘାଟନ କରିଥିଲେ । ଅଗଷ୍ଟ 9ରୁ ଅଗଷ୍ଟ 15 ତାରିଖ ସ୍ଵାଧୀନତା ଦିବସ ପର୍ଯ୍ୟନ୍ତ ଚାଲିବ ଏହି ଶିବିର । ପ୍ରତ୍ୟେକ ଦିନ ଏଠାରେ କୋରୋନା କଟକଣା ମଧ୍ୟରେ 40 ୟୁନିଟ ରକ୍ତ ସଂଗ୍ରହ କରାଯିବ ବୋଲି ସୂଚନା ମିଳିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
