ଭଦ୍ରକ: ଘରୁ ନେଇଯିବା ପରେ ନାବାଳିକାକୁ ହତ୍ୟାକଲା ପ୍ରେମିକ । ଏପରି ଏକ ସଙ୍ଗୀନ ଅଭିଯୋଗ ଆସିଛି ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକରୁ । 6 ମାସ ତଳେ ଘରୁ ନେଇଯାଇଥିବା ନାବାଳିକା ଝିଅକୁ ପ୍ରେମିକ ହତ୍ୟା କରିଥିବା ଖବର ସାମ୍ନାକୁ ଆସିଛି ।
ସୂଚନା ଅନୁଯାୟୀ ଭଦ୍ରକ ଦିଲ୍ଲା ଚାନ୍ଦବାଲି ବ୍ଲକ ବାଂଶଡା ଥାନା ଅନ୍ତର୍ଗତ ଚରଦିଆ ପଞ୍ଚାୟତର ରାମ ଶଙ୍କର କାଣ୍ଡା(ଝଡୁ) ଶୈଳେନ୍ଦ୍ରପଲ୍ଲୀ ଗ୍ରାମର ଗୋପାଳ ମାଇତିଙ୍କ ଚିଙ୍ଗୁଡି ପ୍ଲାଣ୍ଟରେ ଶ୍ରମିକ ଭାବେ କାମ କରୁଥିଲେ । ଏହାରି ମଧ୍ୟରେ ଗୋପାଳଙ୍କ ନାବାଳିକା ଝିଅକୁ ପ୍ରେମ କରି ରାମ ଗତ 2020 ମସିହା ଅକ୍ଟୋବର ମାସରେ ନାବାଳିକାକୁ ନେଇ ଫେରାର୍ ହୋଇ ଯାଇଥିଲେ । ଏନେଇ ଗୋପାଳ ଥାନାରେ ଅପହରଣ ମାମଲା ରୁଜୁ କରିଥିଲେ ମଧ୍ୟ ପୋଲିସ ନାବାଳିକାଙ୍କ କୌଣସି ସନ୍ଧାନ ପାଇନଥିଲେ ।
ତେବେ ଦୀର୍ଘ 6 ମାସ ପରେ ନାବାଳିକାଙ୍କ ମୃତ୍ୟୁ ହୋଇଥିବା ନେଇ ବାପା ଗୋପାଳ ଥାନାରେ ଏତଲା ଦେଇଛନ୍ତି । ଅନ୍ୟପଟେ ଅଭିଯୋଗ ପରେ ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ଅଧିକ ତଦନ୍ତ ଆରମ୍ଭ କରିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
