ଭଦ୍ରକ: ଜାମୁକୋଳି ଖାଇବାକୁ କାହାକୁ ବା ଭଲ ନ ଲାଗେ । ସେଇ ଖୁସିରେ କୋଳି ଖାଇବା ପାଇଁ ଘରୁ ବାହାରି ଯାଇଥିଲା ନାବାଳକ । ସାଙ୍ଗ ସହିତ ଗଛରେ ଚଢି କୋଳି ବି ଖାଇଲା । ହେଲେ କିଏ ଜାଣିଥିଲା ସେହି ଗଛରେ ତାକୁ ମୃତ୍ୟୁ ଅପେକ୍ଷା କରିଛି । କୋଳି ଖାଇବା ପାଇଁ ଗଛରେ ଚଢିବା ସମୟରେ ବିତ୍ୟୁତ ତାର ସଂସ୍ପର୍ଶରେ ଆସି ଆଖି ବୁଜିଛି 12 ବର୍ଷର ନାବାଳକ ଆଲୋକ ମହାଭୋଇ । ଏପରି ଦୁଃଖଦ ଘଟଣା ଘଟିଛି ଭଦ୍ରକ ଜିଲ୍ଲା ଗ୍ରାମାଞ୍ଚଳ ଥାନା ଲାଙ୍ଗୁଡି ଅଞ୍ଚଳରେ ।
ସୂଚନା ଅନୁସାରେ, ଭଦ୍ରକ ଗ୍ରାମାଞ୍ଚଳ ଥାନା ଲାଙ୍ଗୁଡ଼ି ସ୍ଥିତ ଉତ୍କଳମଣି ଦରିଦ୍ର ନାରାୟଣ ସେବା ଆଶ୍ରମରେ ରହି ଆଲୋକ ପାଠ ପଢୁଥିଲେ । ଗତକାଲି ଆଲୋକ ଜଣେ ସାଙ୍ଗ ସହିତ ଜାମୁକୋଳି ଖାଇବାକୁ ଆଶ୍ରମ ବାହାରେ ଥିବା ଗଛରେ ଚଢିଥିଲେ । ଏହି ସମୟରେ ବିଦ୍ୟୁତ ତାର ସଂସ୍ପର୍ଶରେ ଆସି ତଳେ ପଡିଯାଇଥିଲେ । ଏହା ପରେ ତାଙ୍କୁ ଡାକ୍ତରଖାନା ନିଆଯାଇଥିଲେ ବି ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ ।
ଏହା ସହିତ ଅନ୍ୟଜଣେ ସାମାନ୍ୟ ଆହତ ହୋଇଥିବା ଜଣାପଡିଛି । ଘଟଣାରେ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି । ଘଟଣା ସାମ୍ନାକୁ ଆସିବା ପରେ ଆଶ୍ରମ କର୍ତ୍ତୃପକ୍ଷ ଅବହେଳା ଯୋଗୁଁ ଅକାଳରେ ପିଲାଟିର ଜୀବନ ଚାଲିଯାଇଥିବା ପିରବାର ଲୋକ ଅଭିଯୋଗ କରିଛନ୍ତି ।
ଭଦ୍ରକରୁ ଦୋବାଶିଷ ମହାପାତ୍ର, ଇଟିଭି ଭାରତ
