ଭଦ୍ରକ : ତିହିଡି ଥାନା କମାରିଆ ବଜାର ନିକଟରେ ରହୁଥିବା ଏକ ବସ୍ତିରେ ଜଣେ ମହିଳାଙ୍କୁ ସଂଘବଦ୍ଧ ଭାବେ ଆକ୍ରମଣ କରାଯାଇଥିବା ଅଭିଯୋଗ ହୋଇଛି । ଆକ୍ରମଣର ଶିକାର ହୋଇ ମୁର୍ମୁଷ ଅବସ୍ଥାରେ ଗାଁ ଦାଣ୍ଡରେ ପଡିଥିବାବେଳେ ତାଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ତିହିଡି ଡାକ୍ତରଖାନାରେ ଭର୍ତ୍ତି କରାଯାଇଛି । ତେବେ ଏହି ଆକ୍ରମଣରେ ଜଡିତ ଅଭିଯୁକ୍ତଙ୍କ ବିରୋଧରେ ପଦକ୍ଷେପ ନେବାକୁ ଦାବି କରିଛନ୍ତି ମହିଳାଙ୍କ ସ୍ବାମୀ ।
ସୂଚନା ଅନୁସାରେ ମଙ୍ଗଳପୁର ଗାଁର କାଳନ୍ଦି ସେଠୀ କମାରିଆ ବଜାରସ୍ଥିତ କୋହ୍ଲ ରାଜସ୍ବ ଗ୍ରାମରେ ଘର କରି ସପରିବାର ରହିଆସୁଛନ୍ତି। ତେବେ ପୂର୍ବ ଶତ୍ରୁତାକୁ କେନ୍ଦ୍ର କରି କିଛି ସ୍ଥାନୀୟ ଲୋକେ ପ୍ରଥମେ କାଳନ୍ଦିଙ୍କ ସ୍ତ୍ରୀ ସୁକାନ୍ତି ସେଠୀଙ୍କୁ ଗାଳି ଗୁଲଜ କରିଥିଲେ । ଏହାର ପ୍ରତିବାଦ କରିବାରୁ ଅପରପକ୍ଷ ଉତ୍କ୍ଷିପ୍ତ ହୋଇ ସଂଘବଦ୍ଧ ଭାବେ ତାଙ୍କୁ ଆକ୍ରମଣ କରିଥିଲେ। ତଳେ ପଡି ସୁକାନ୍ତୀ ଆକୁଳ ଚିତ୍କାର କରିବା ପରେ ତାଙ୍କ ସ୍ବାମୀ ଦୌଡି ଆସିବାରୁ ସେ ମଧ୍ୟ ଆକ୍ରମଣରୁ ବାଦ ପଡିନଥିଲେ । ଉଭୟ ଦମ୍ପତି ଆକ୍ରମଣର ଶିକାର ହୋଇଥିଲେ।
ମହିଳା ଜଣଙ୍କୁ ନିସ୍ତୁକ ମାଡ ଫଳରେ ହାତ ଗୋଡ ସହ ଶରୀରର ବିଭିନ୍ନ ଅଂଶରେ ଗଭୀର ଆଘାତ ଲାଗିଥିବା ଦେଖିବାକୁ ମିଳିଛି । ପରେ କେତେକ ସ୍ଥାନୀୟ ଲୋକଙ୍କ ସହାୟତାରେ ସ୍ତ୍ରୀଙ୍କୁ ମୁର୍ମୁଷ ଅବସ୍ଥାରେ ଉଦ୍ଧାର କରି କାଳନ୍ଦି ଆମ୍ବୁଲାନ୍ସକୁ ଡକାଇ ତିହିଡି ମେଡିକାଲରେ ଭର୍ତ୍ତି କରିଛନ୍ତି । ଅଭିଯୁକ୍ତଙ୍କ ବିରୋଧରେ ବିହିତ ପଦକ୍ଷେପ ନେବାକୁ ତିହିଡି ଥାନାରେ ଏତଲା ଦେଇଥିବା ଜଣାପଡିଛି।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
