ଭଦ୍ରକ: ପୋଲିସର ଥାର୍ଡ ଡିଗ୍ରୀ ପରେ ନିରଞ୍ଜନଙ୍କ ମୃତ୍ୟୁ ଘଟଣା । ଜାତୀୟ ମାନବାଧିକାର କମିଶନ (NHRC)ରେ ମୃତକଙ୍କୁ ନ୍ୟାୟ ପ୍ରଦାନ ପାଇଁ ଆବେଦନ କଲେ ଜାତୀୟ ମାନବାଧିକାର କର୍ମୀ ଭଜମନ ବିଶ୍ୱାଳ । ମୃତକ ଭଦ୍ରକ ଜିଲ୍ଲା ବାସୁଦେବପୁର ଥାନା ଅଲବଗା ଗାଁର ଭାଗବତ ପାଣି ଓ ଶାନ୍ତିଲତା ପାଣିଙ୍କ ବଡ ପୁଅ ନିରଞ୍ଜନ ବୋଲି ଜଣାଯାଇଛି । ନିରଞ୍ଜନ କୌଣସି ଅପରାଧରେ ସାମିଲ ହୋଇନଥିବା ଏବଂ ତାଙ୍କର ଗିରଫ ପରେ ପରିବାର ଲୋକଙ୍କୁ ସୂଚନା ନଦେବା ଆଦି ପ୍ରସଙ୍ଗକୁ ନେଇ ଆଇନରେ ଆଶ୍ରୟ ନେବାକୁ ଚେତାବନୀ ଦିଆଯାଇଛି ।
ଅଭିଯୋଗ ମୁତାବକ, ଗତ ଅକ୍ଟୋବର ୧୪ ତାରିଖରେ ଢେଙ୍କାନାଳ ଜିଲ୍ଲାର ଗଁଦିଆ ପୋଲିସ ଏବଂ ଭଦ୍ରକ ଜିଲ୍ଲା ବାସୁଦେବପୁର ପୋଲିର ମିଳିତ ଉଦ୍ୟମରେ ବଳପୂର୍ବକ ନିରଞ୍ଜନକୁ ଘରୁ ଉଠେଇ ନେଇଥିଲେ । ଏଥିସହ ନିରଞ୍ଜନ ମାଆଙ୍କ ବ୍ୟାଗରୁ ନଗଦ୍ ୨୦ ହଜାର ଟଙ୍କା ଓ ବ୍ୟବହୃତ ସୁନା ଅଳଙ୍କାର ମଧ୍ୟ ନେଇ ଯାଇଥିଲେ । କୌଣସି ଏକ ଘଟଣାରେ ନିରଞ୍ଜନକୁ ଗଁଦିଆ ପୋଲିସ ପଚରାଉଚରା କରି ଘରକୁ ପଠେଇ ଦେବ ବୋଲି ମାଆ ଶାନ୍ତିଲତାଙ୍କୁ ବାସୁଦେବପୁର ପୋଲିସ ପ୍ରତିଶ୍ରୁତି ଦେଇଥିଲେ । ମାତ୍ର ପୁଅ ୫ ଦିନ କାଳ ଘରକୁ ନଫେରିବାରୁ ଶାନ୍ତିଲତା ଗତ ଅକ୍ଟୋବର ୧୯ରେ ଗଁଦିଆ ଥାନାର ଆଇଆଇସିଙ୍କୁ ଭେଟିଥିଲେ । ମାତ୍ର ସେଠାରେ ପୋଲିସ ତାଙ୍କ ପୁଅ ସହିତ ଭେଟ ନକରାଇ ଗାଳିଗୁଲଜ କରି ଫେରେଇ ଦେଇଥିଲେ ।
ପରେ ଗତ ଅକ୍ଟୋବର ୨୭ ତାରିଖରେ ଢେଙ୍କାନାଳ ଏସପି ସାମ୍ବାଦିକ ସମ୍ମିଳନୀରେ ଜଣାଇଥିଲେ ଯେ, ଏକ ATM ଚୋରି ମାମଲାରେ ନିରଞ୍ଜନଙ୍କ ସମେତ ୩ ଜଣଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିଲା । ଏହାର ପରଦିନ ମାଆ ଶାନ୍ତିଲତା ଢେଙ୍କାନାଳ ଜେଲରେ ପୁଅକୁ ଭେଟିଥିଲେ । ସେଠାରେ ପୁଅ ନିରଞ୍ଜନକୁ ଉଭୟ ବାସୁଦେବପୁର ଓ ଗଁଦିଆ ପୋଲିସ ଥାର୍ଡ ଡିଗ୍ରୀ ଦେବା ସହିତ ବିଭିନ୍ନ ସ୍ଥାନରେ ଅଟକ ରଖି ୨୭ ତାରିଖରେ କୋର୍ଟ ଚାଲାଣ କରିଥିବା ତାଙ୍କ ଠାରୁ ଜାଣିବାକୁ ପାଇଥିଲେ । ଏପରିକି ନିରଞ୍ଜନର ଗୁପ୍ତାଙ୍ଗରେ ଗଭୀର କ୍ଷତ ସହ ଶରୀରର ବିଭିନ୍ନ ସ୍ଥାନରେ ଖଣ୍ଡିଆ ଖାବରା ହୋଇଥିବା ମାଆ ଦେଖିବାକୁ ପାଇଥିଲେ । ସେ ପୁଅକୁ ଜାମିନରେ ଆଣିବାକୁ ପ୍ରକ୍ରିୟା ଆରମ୍ଭ କରିଥିବା ବେଳେ ହଠାତ୍ ନିରଞ୍ଜନ ଅସୁସ୍ଥ ହୋଇ ମେଡିକାଲରେ ଭର୍ତ୍ତି ହୋଇଥିବା ଖବର ପାଇଥିଲେ । ନିରଞ୍ଜନଙ୍କ ସ୍ବାସ୍ଥ୍ୟବସ୍ଥା ଅତ୍ୟନ୍ତ ଗୁରୁତର ଥିଲା ଓ ସେ କଥା ହେବା ଅବସ୍ଥାରେ ନଥିଲେ ।
ସେଦିନ ନିରଞ୍ଜନକୁ ଚିକିତ୍ସା ଲାଗି କଟକ ବଡ ମେଡିକାଲକୁ ସ୍ଥାନାନ୍ତର କରାଯାଇଥିଲା । ମାତ୍ର ସେଠାରେ ଚିକିତ୍ସାଧିନ ଅବସ୍ଥାରେ ଚଳିତ ମାସ ୫ ତାରିଖରେ ତାଙ୍କର ମୃତ୍ୟୁ ହୋଇଥିଲା । ତେବେ ନିରଞ୍ଜନଙ୍କ ମୃତ୍ୟୁ ପାଇଁ ଉଭୟ ଥାନାର ପୋଲିସ ଓ ଢେଙ୍କାନାଳ ଏସପିଙ୍କୁ ଦାୟୀ କରିଛନ୍ତି ମାଆ ଶାନ୍ତିଲତା । ଏଥିସହ ୧୩ ଦିନ କାଳ ତାଙ୍କ ପୁଅକୁ ପୋଲିସ କେଉଁ ଆଇନ୍ ବଳରେ ଓ କେଉଁଠି ରଖିଲା ତାହାର ହିସାବ ମାଗିଛନ୍ତି । ନିରଞ୍ଜନଙ୍କୁ ଘରୁ ଉଠେଇ ନେବାପରେ ବାସୁଦେବପୁର ପୋଲିସକୁ ଷ୍ଟେସନ୍ ଡାଏରୀର କପି ମାଗିଥିଲେ ମାତ୍ର ଆଇଆଇସି ନଦେବାରୁ ସେ ସୂଚନା ଆଇନ୍ ବଳରେ ଆବେଦନ କରିବେ ବୋଲି ସୂଚନା ମିଳିଛି ।
ଅନ୍ୟପଟେ ମୃତକ ପରିବାରକୁ ନ୍ୟାୟ ପ୍ରଦାନ କରିବା ଲାଗି ଢେଙ୍କାନାଳର ଜାତୀୟ ମାନବାଧିକାର କର୍ମୀ ଭଜମନ ବିଶ୍ୱାଳ ନୂଆଦିଲ୍ଲୀ କାର୍ଯ୍ୟାଳରେ ଅଭିଯୋଗ କରିଛନ୍ତି । ପ୍ରାଥମିକ ସ୍ତରରେ ତାଙ୍କର ଆବେଦନ ପତ୍ର ଜାତୀୟ ମାନବାଧିକାର କମିଶନ କାର୍ଯ୍ୟାଳୟରେ ଡାଏରୀ ନମ୍ବର 18567/IN/2022 ହୋଇଥିବା ଜଣାଯାଇଛି । ପୋଲିସ ନିଜକୁ ଜଣେ ବିଚାରପତି ଓ ଥାନାକୁ ବିଚାରଳୟ ଭାବୁଛନ୍ତି । ତେବେ କୋର୍ଟ ଓ ବିଚାରପତି କଣ ପାଇଁ ରହିଛନ୍ତି ବୋଲି ମାନବଧିକାର ପ୍ରତିନିଧି ପ୍ରଶ୍ନ କରିଛନ୍ତି ।
ଯେଉଁମାନେ ନିରଞ୍ଜନଙ୍କୁ ମାରିଛନ୍ତି ସେମାନଙ୍କ ବିରୋଧରେ ଦୃଷ୍ଟାନ୍ତମୂଳକ ପଦକ୍ଷେପ ଗ୍ରହଣ କରିବା ପୂର୍ବକ ଧାରା 302, 323, 201 ଏବଂ 34 ଆଇପିସିରେ କେସ କରାଯାଇ ଅବିଳମ୍ବେ ଚାକିରିରୁ ବରଖାସ୍ତ କରାଯିବାକୁ ସେ ଆବେଦନ ପତ୍ରରେ ଦର୍ଶାଇଛନ୍ତି । ଏଥିସହ ମୃତକ ପରିବାରକୁ 15 ଲକ୍ଷ ଟଙ୍କାର କ୍ଷତିପୂରଣ ପ୍ରଦାନ କରାଯିବାକୁ ଭଜମନ ବିଶ୍ୱାଳ ଦାବି କରିଛନ୍ତି । ସେପଟେ ନ୍ୟାୟ ପାଇଁ ମୃତକଙ୍କ ମାଆ ରାଷ୍ଟ୍ରପତିଙ୍କ ସମେତ ପ୍ରଧାନମନ୍ତ୍ରୀ, ଜାତୀୟ ମାନବାଧିକାର କମିଶନ, ଓଡିଶାର ରାଜ୍ୟପାଳ, ମୁଖ୍ୟମନ୍ତ୍ରୀ, ହାଇକୋର୍ଟର ମୁଖ୍ୟ ବିଚାରପତି, ଡିଜିପି, ରାଜ୍ୟ ମାନବଧିକାର କମିଶନ ଓ ଭଦ୍ରକ ଜିଲ୍ଲା ଆରକ୍ଷୀ ଅଧିକ୍ଷକଙ୍କୁ ଅନୁରୋଧ କରିଥିବା ସୂଚନା ମିଳିଛି । ହେଲେ ଏନେଇ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ ।
ଇଟିଭି ଭାରତ, ଭଦ୍ରକ
