ଭଦ୍ରକ: ଏକତରଫା ପ୍ରେମ ପାଇଁ ଜଣେ ଛାତ୍ରୀଙ୍କୁ ଅପହରଣ କରାଯାଇଥିବା ଅଭିଯୋଗ ହୋଇଛି । ଏଭଳି ଘଟଣା ଘଟିଛି ଭଦ୍ରକର ଆଗରପଡା ଥାନା ଅଞ୍ଚଳରେ । ଅପହରଣ କରାଯିବା ପରେ ଛାତ୍ରୀଜଣଙ୍କୁ ସାଳନ୍ଦୀ ନଦୀ କୂଳରୁ ଅସୁସ୍ଥ ଅବସ୍ଥାରେ ଉଦ୍ଧାର କରାଯାଇଥିଲା । ପରେ ଚିକିତ୍ସା ପାଇଁ ଭଦ୍ରକ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ପରିବାର ଲୋକଙ୍କ ଅଭିଯୋଗ ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ସୂଚନା ଅନୁସାରେ, ବିଦ୍ୟାଳୟକୁ ଯିବା ସମୟରେ ଛାତ୍ରୀଙ୍କୁ ଅପହରଣ କରାଯାଇଥିଲା । ଏକତରଫା ପ୍ରେମ କରୁଥିବା ଯୁବକଙ୍କ କଥାରେ ଛାତ୍ରୀଙ୍କୁ ବାନ୍ଧବୀ ନିଶା ଦେଇ ଅପହରଣ କରିଥିବା ଅଭିଯୋଗ ହୋଇଛି । ଦୀର୍ଘ 6 ଘଣ୍ଟା ପରେ ତାଙ୍କୁ ଟିକିରା ନିକଟ ସାଳନ୍ଦୀ ନଦୀ କୂଳରୁ ଅସୁସ୍ଥ ଅବସ୍ଥାରେ ଉଦ୍ଧାର କରାଯାଇଛି । ପ୍ରଥମେ ତାଙ୍କୁ ଆଗରପଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଓ ପରେ ଭଦ୍ରକ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଆଗରପଡା ଥାନାରେ ପରିବାର ଲୋକେ ଲିଖିତ ଅଭିଯୋଗ କରିବା ପରେ ଆଗରପଡା ଥାନା ପୋଲିସ ତଦନ୍ତ ଆରମ୍ଭ କରିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
