ଭଦ୍ରକ: ସ୍ବାଧୀନତା ଦିବସରେ ଅଭାବନୀୟ ଘଟଣା । ସାରା ରାଜ୍ୟ ଉତ୍ସବ ମୁଖର ଥିବାବେଳେ ଭଦ୍ରକ ଜିଲ୍ଲାର ଗ୍ରାମାଞ୍ଚଳ ଥାନା ବଙ୍ଗାଳି ସାହିରେ ଭୟଙ୍କର ଅଗ୍ନିକାଣ୍ଡ ଘଟିଛି । ନିଆଁ ଲାଗି 6 ବଖରା ଘର ଜଳିଯିବା ସହ ଲକ୍ଷାଧିକ ସମ୍ପତ୍ତି ପୋଡି ପାଉଁଶ ହୋଇଯାଇଛି । କୁହାଯାଉଛି ଗ୍ୟାସ ଟାଙ୍କି ଲିକ ହୋଇ ଏହିପରି ଅଗ୍ନିକାଣ୍ଡ ଘଟିଛି। ଏହି ଅଗ୍ନିକାଣ୍ଡରେ 5 ଟି ପରିବାର ସର୍ବସ୍ବାନ୍ତ ହୋଇପଡିଛନ୍ତି ।
ସୂଚନାଯୋଗ୍ୟ, ଘରେ ଗ୍ୟାସ ସିଲିଣ୍ଡରରୁ ଗ୍ୟାସ ଲିକ ହୋଇ ଚାରିଆଡେ ବ୍ୟାପି ଯାଇଥିଲା। କୌଣସି କାରଣରୁ ଏହା ଅଗ୍ନି ସଂସ୍ପର୍ଶରେ ଆସି ହଠାତ ନିଆଁ ଲାଗିଯାଇଥିଲା। ନିଆଁର ପ୍ରକୋପ ଏତେ ଥିଲା ଯେ ଚାହୁଁ ଚାହୁଁ 6 ବଖରା ଘର ଜଳି ଯାଇଥିଲା। ଘରେ ଥିବା ସ୍ଵର୍ଣ୍ଣ ଅଳଙ୍କାର, ନଗଦ ଲକ୍ଷାଧିକ ଟଙ୍କା, ଗୁରୁତ୍ୱପୂର୍ଣ୍ଣ ସାର୍ଟିଫିକେଟ ଓ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ କାଗଜପତ୍ର, ଧାନ, ସମେତ ସମସ୍ତ ଆସବାବପତ୍ର ସମ୍ପୂର୍ଣ୍ଣ ଜଳିପୋଡି ପାଉଁଶ ହୋଇଯାଇଛି।
ସେପଟେ ଏନେଇ ଖବର ପାଇ ଭଦ୍ରକରୁ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଛି । ତେବେ ଏହି ଅଗ୍ନିକାଣ୍ଡରେ କେହି ମୃତାହତ ହୋଇନଥିବା ଜଣାପଡିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
