ଭଦ୍ରକ: କୁହାଯାଏ ମୃତଦେହକୁ ସତ୍କାର କଲେ ହିଁ ଆତ୍ମାକୁ ଶାନ୍ତି ମିଳେ । କିନ୍ତୁ ବିବାଦ ଲାଗି ପଡି ରହିଲା ମୃତଦେହ, ତାହା ପୁଣି ଘଣ୍ଟାଏ କି ଦୁଇ ଘଣ୍ଟା ନୁହେଁ ପ୍ରାୟ 2 ଦିନ ଧରି । ଏଭଳି ଦୁଃଖଦ ଘଟଣା ଘଟିଛି ତିହିଡି ଥାନା ଅଧୀନସ୍ଥ କାଁପଡ଼ା ପଞ୍ଚାୟତର ଚିଲପଦା ଗ୍ରାମରେ ।
ସୂଚନା ଅନୁଯାୟୀ, ଗତ ଦୁଇ ଦିନ ତଳେ ଉକ୍ତ ଗ୍ରାମର ହେମନ୍ତ ମଳିକଙ୍କ ମୃତଦେହ ଘରପାଖ ପୋଖରୀରୁ ମିଳିଥିଲା । ପୋଲିସ ଅପମୃତ୍ୟୁ ମାମଲା ରୁଜୁ କରି ଶବ ବ୍ୟବଚ୍ଛେଦ କରିବା ସହ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରିଥିଲା । ହେଲେ ମୃତକଙ୍କ ସାନ ଭାଇ ହେମନ୍ତଙ୍କୁ ସ୍ଥାନୀୟ ଲୋକେ ହତ୍ୟା କରିଥିବା ଅଭିଯୋଗ ଆଣିବା ସହ ହତ୍ୟାକାଣ୍ଡରେ ଜଡିତ ତାଙ୍କ ସ୍ତ୍ରୀ ଓ ଦୁଇ ପୁଅଙ୍କ ବିରୋଧରେ ଦୃଷ୍ଟାନ୍ତମୂଳକ ପଦକ୍ଷେପ ନେବାକୁ ଦାବି କରିଥିଲେ । ଏଥିସହ ଶବ ସତ୍କାର କରି ନଥିଲେ । ଫଳରେ 2ଦିନ ଧରି ଘରେ ସେମିତି ପଡି ରହିଥିଲା ମୃତଦେହ ।
ତେବେ ତିହିଡି ପୋଲିସ ଘଟଣାସ୍ଥଳରେ ପହଞ୍ଚି ବୁଝାସୁଝା କରିବା ସହ ଦୋଷୀ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବା ନେଇ ପ୍ରତିଶୃତି ଦେବା ପରେ ମୃତଦେହକୁ ସତ୍କାର କରାଯାଇଛି ।
ଭଦ୍ରକକୁ ଦେବାଶିଷ ମହାପାତ୍ର, ଇଟିଭି ଭାରତ
