ଭଦ୍ରକ: କୋରୋନାରେ ମୃତ୍ୟୁ ବରଣ କଲେ ଗାଁ ଶ୍ମଶାନରେ ହେବନି ଶବଦାହ । କୋରୋନା ମୃତକଙ୍କ ସତ୍କାର ପାଇଁ ହୀନସ୍ତା ହେଉଛନ୍ତି ପରିବାର ଲୋକେ। ଏଭଳି ଘଟଣା ଦେଖିବାକୁ ମିଳିଛି ଭଦ୍ରକ ଜିଲ୍ଲା ରାଣୀତାଲ ଗାଁରେ । ସୂଚନା ଅନୁଯାୟୀ ସେହି ଗାଁର ଜଣେ ମହିଳାଙ୍କ ସ୍ବାସ୍ଥ୍ୟବସ୍ଥା ଖରାପ ହେବାରୁ ତାଙ୍କୁ କଟକ ବଡ ମେଡିକାଲକୁ ନେଇଥିଲେ । ସେଠାରେ ଚିକିତ୍ସା ହେବା ସମୟରେ ସେ କୋରୋନାରେ ଆକ୍ରାନ୍ତ ହୋଇଥିବା ଜଣାପଡିଥିଲା । ତେବେ ସେଠାରେ କିଛି ଦିନ ଚିକିତ୍ସିତ ହେବା ପରେ ସେ ଘରକୁ ଆସି ହୋମ ଆଇସୋଲେସନ ରହିଥିଲେ।
ହେଲେ ବିଧିର ବିଧାନ ଥିଲା କିଛି ଅଲଗା, ଘରେ ତାଙ୍କର ମୃତ୍ୟୁ ହୋଇଥିଲା। ପରେ ପରିବାର ଲୋକେ ଏନେଇ ପ୍ରଶାସନ ଓ ଲୋକ ପ୍ରତିନିଧି ମାନଙ୍କୁ ଅବଗତ କରାଇଥିଲେ। ହେଲେ କେହି କିଛି ଶୁଣି ନଥିଲେ। ଶେଷରେ ନିରୁପାୟ ହୋଇ ବହୁ କଷ୍ଟରେ ଅନ୍ତିମ ସଂସ୍କାର କରିବା ପାଇଁ ଗାଁ ଶ୍ମଶାନକୁ ଯାଇଥିଲେ। ହେଲେ ସେଠାରେ ଗାଁଲୋକେ ବିରୋଧ କରିଥିଲେ । ନିରୂପାୟ ହୋଇ ସେଠାରୁ ଫେରି ଆସି ପରିବାର ଲୋକେ ନିଜ ବାଡିରେ ଶବଦାହ କରିଥିବା ଜଣାପଡ଼ିଛି। ତେବେ ଏଭଳି ଘଟଣା ଏବେ ସାମ୍ନାକୁ ଆସିବା ପରେ, ପ୍ରଶାସନର କୋଭିଡ-19 ପରିଚାଳନା ନେଇ ପ୍ରଶ୍ନ ଉଠିଛି ।
ଭଦ୍ରକରୁ ଦେବାଶିଷ ମହାପାତ୍ର,ଇଟିଭି ଭାରତ
