ଭଦ୍ରକ: ଜିଲ୍ଲାପାଳଙ୍କ ସଦଭାବନା ସଭାଗୃହ ପରିସରରେ ଏକ ବୈଠକ ଜିଲ୍ଲାପାଳ ଜ୍ଞାନ ଦାସଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ଚଳିତବର୍ଷର ଧାନ ସଂଗ୍ରହ ସଂପର୍କରେ ଏହି ବୈଠକରେ ଆଲୋଚନା କରାଯାଇଥିଲା । ଜିଲ୍ଲାରେ 2019-20 ଖରିଫ ଋତୁରେ ସରକାରଙ୍କ ପକ୍ଷରୁ ଚଳିତ ଡିସେମ୍ବର 20 ରୁ ଧାନକିଣା ଆରମ୍ଭ ହେବ ଏବଂ ମାର୍ଚ୍ଚ ମାସ 31 ତାରିଖରେ ଶେଷ ହେବ।
ଗତବର୍ଷ ଜିଲ୍ଲାରେ 108 ଟି ସୋସାଇଟି ଜରିଆରେ ଧାନ ସଂଗ୍ରହ କରାଯାଇଥିଲା । କିନ୍ତୁ ଚଳିତବର୍ଷ 99 ଟି ସୋସାଇଟି ଓ 27 ଟି ମହିଳା ସ୍ବୟଂ ସହାୟକ ଗୋଷ୍ଠୀ ମାଧ୍ୟମରେ ଧାନ କିଣାଯିବାର ଲକ୍ଷ୍ୟଧାର୍ଯ୍ୟ କରାଯାଇଛି। ଜିଲ୍ଲାରେ ଚଳିତବର୍ଷ ଧାନକ୍ରୟ ପାଇଁ 51 ହଜାର ଚାଷୀ ମାନେ ବିଭିନ୍ନ ସୋସାଇଟି ଜରିଆରେ ନାମ ପଞ୍ଜିକରଣ କରିଛନ୍ତି । ସରକାରଙ୍କ ପକ୍ଷରୁ ଚାଷୀ ମାନଙ୍କଠାରୁ ସାଧାରଣ ଧାନ ମୂଲ୍ୟ କୁଇଣ୍ଟାଇ ପ୍ରତି 1815 ଟଙ୍କା ହାରରେ ଧାନକ୍ରୟ କରାଯିବ ଏବଂ ଚାଷୀମାନଙ୍କୁ ଧାନବିକ୍ରିର ମୂଲ୍ୟ ସିଧାସଳଖ ବ୍ୟାଙ୍କ ଆକାଉଣ୍ଟ ଜରିଆରେ ଦିଆଯିବ।
ଏହି ବୈଠକରେ ବିଧାୟକ ପ୍ରଫୁଲ ସାମଲ, ଜିଲ୍ଲା ପରିଷଦର ସଭାପତି ଦ୍ୱିଜବର ରାଉତ, ଅତିରିକ୍ତ ଜିଲ୍ଲାପାଳ ଶ୍ୟାମଭକ୍ତ ମିଶ୍ର, ଉପଜିଲ୍ଲାପାଳ ପିତାମ୍ବର ସାମଲ, ପିଡି ମଧୁସୂଦନ ଦାସଙ୍କ ସମେତ ଜିଲ୍ଲା ଯୋଗାଣ ଅଧିକାରୀଙ୍କ ସମସ୍ତ ବିଭାଗୀୟ ଅଧିକାରୀ ମାନେ ଯୋଗ ଦେଇଥିଲେ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
