ଭଦ୍ରକ: ବିବାହ ପୂର୍ବରୁ ନାବାଳିକା ଉଦ୍ଧାର । ଏଭଳି ଏକ ଘଟଣା ଘଟିଛି ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ନରସିଂହପୁର ପଞ୍ଚାୟତରେ। ଖବର ଅନୁଯାୟୀ ଜୟପୁର ଗ୍ରାମର ଶମ୍ବୁନାଥ ସାହୁଙ୍କ ନାବାଳିକା ଝିଅର ନିକଟସ୍ଥ ବ୍ରାହ୍ମଣ ଗାଁରେ ବିବାହ ହେବାକୁ ଯାଉଥିଲା । ଏନେଇ ବାସୁଦେବପୁର ରାଧାକୃଷ୍ଣ ମନ୍ଦିରରେ ସମସ୍ତ ପ୍ରସ୍ତୁତି ସରିଥିଲା । କିନ୍ତୁ ଶେଷ ମୁର୍ହୁତ୍ତରେ ସବୁ ହୋଇଯାଇଥିଲା ଓଲଟପାଲଟ । କନ୍ୟା ନାବାଳିକା ହୋଇଥିବା ଜାଣି ବିବାହ ସ୍ଥଳରେ ପହଞ୍ଚିଥିଲେ ସିଡବ୍ଲୁସି ଅଧିକାରୀ ।
ବିବାହ ପାଇଁ ଯାଉଥିବା ଝିଅର ବୟସ ପ୍ରମାଣ ପତ୍ର ଦେଖିବା ପାଇଁ ଚାହିଁଥିବା ବେଳେ ଘରର ଲୋକମାନେ ଶେଷ ପର୍ଯ୍ୟନ୍ତ ତାହା ଦେଖାଇବାରେ ସମର୍ଥ ହୋଇପାରିନଥିଲେ । ଅପରପକ୍ଷରେ ଆଧାର କାର୍ଡରେ ଝିଅ ସାବାଳିକା ହୋଇଥିବା ଦର୍ଶାଇ ଥିଲେ । ଶେଷରେ ସିଡବ୍ଲୁସି ଅଧିକାରୀ ଏବଂ ସିଡିପିଓ ପୋଲିସ ସହାୟତାରେ ଝିଅକୁ ସେମାନଙ୍କ ହେଫାଜତକୁ ଆଣିଥିଲେ । ସାବାଳିକା ହୋଇଥିବାର ଉପଯୁକ୍ତ ବୟସ ପ୍ରମାଣ ପତ୍ର ଦାଖଲ ନକରି ପାରିଲେ ନିୟମ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜଣାପଡିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
