ଭୁବନେଶ୍ବର: ଧାମନଗର ନିର୍ବାଚନ (Dhamnagar Bypoll) ପ୍ରକ୍ରିୟା ସୁରୁଖୁରୁରେ ଚାଲିଛି । ନଭେମ୍ବର 1 ତାରିଖରେ ପ୍ରଚାର ଶେଷ ହେବା ସହ 3 ରେ ନିର୍ବାଚନ ଓ 6 ରେ ଫଳାଫଳ ଘୋଷଣା ହେବ । ଏହାସହ ନିର୍ବାଚନକୁ ନିରପେକ୍ଷ ଭାବେ ଶେଷ କରିବା ଲାଗି ବିଭିନ୍ନ ପଦକ୍ଷେପ ନେଇଛନ୍ତି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ (Chief Electoral Officer) ସୁଶୀଲ କୁମାର ଲୋହାନି (Sushil Kumar Lohani ) । ଏହା ସହ 2 ଜଣ କେନ୍ଦ୍ରୀୟ ପର୍ଯ୍ୟବେକ୍ଷକ ନିୟୋଜିତ ହୋଇଥିବା ସିଇଓ ସୂଚନା ଦେଇଛନ୍ତି ।
ସିଇଓଙ୍କ ସୂଚନା ଅନୁସାରେ, ଧାମନଗର ଉପନିର୍ବାଚନରେ 1108 ପୋଲିଂ ଅଧିକାରୀ ନିୟୋଜିତ ହେବେ । ସେମାନଙ୍କର 2 ରାଉଣ୍ଡ ଟ୍ରେନିଂ ଶେଷ ହୋଇଛି । ନିୟୋଜିତ ପୋଲିଂ ଅଧିକାରୀ ଚୟନରେ 2 ଟି ଦିଗ ଉପରେ ଧ୍ୟାନ ଦିଆଯାଇଛି । ସେମାନେ ଧାମନଗରର ଭୋଟର ହୋଇନଥିବେ କିମ୍ବା ତାଙ୍କର ପୈତୃକ ଘର ସେଠାରେ ହୋଇନଥିବ । ଅନ୍ୟଟି ହେଲା ଉକ୍ତ ଅଞ୍ଚଳରେ ତାଙ୍କର ପୋଷ୍ଟିଂ ହୋଇଥିବ । ଫଳରେ ନିରପେକ୍ଷ ନିର୍ବାଚନ ହୋଇପାରିବ ।
ସେହିପରି ନିୟୋଜିତ ପୋଲିସ ଅଧିକାରୀଙ୍କ କ୍ଷେତ୍ରରେ ସମାନ ନିୟମ ଲାଗୁ ହୋଇଛି ବୋଲି ସିଇଓ ସୂଚନା ଦେଇଛନ୍ତି । ସିଇଓ ଆହୁରି ମଧ୍ୟ କହିଛନ୍ତି ଯେ, 2 ଜଣ ସେଣ୍ଟ୍ରାଲ ପର୍ଯ୍ୟବେକ୍ଷକ ନିୟୋଜିତ ହୋଇଛନ୍ତି । ଜଣେ ସାଧାରଣ ପର୍ଯ୍ୟବେକ୍ଷକ ଓ ଅନ୍ୟ ଜଣେ ଖର୍ଚ୍ଚ ପର୍ଯ୍ୟବେକ୍ଷକ । ଉଭୟ ପର୍ଯ୍ୟବେକ୍ଷକଙ୍କ ଫୋନ ନମ୍ବର ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ପକ୍ଷରୁ ସର୍ବ ସାଧାରଣ କରାଯାଇଛି । ଯେକୌଣସି ଅଭିଯୋଗ ନେଇ ସେମାନଙ୍କ ସହ ସିଧାସଳଖ ଦୃଷ୍ଟି ଆକର୍ଷଣ କରାଯାଇପାରିବ ।
ସାଧାରଣ ପର୍ଯ୍ୟବେକ୍ଷକ ହେଉଛନ୍ତି ନିରଞ୍ଜନ କୁମାର । ସେ ପଶ୍ଚିମବଙ୍ଗ କ୍ୟାଡ଼ର ଆଇଏଏସ ଅଫିସର । ତାଙ୍କ ଫୋନ ନମ୍ବର ହେଉଛି 7854826509 । ଖର୍ଚ୍ଚ ପର୍ଯ୍ୟବେକ୍ଷକ ହେଉଛନ୍ତି ପ୍ରଣେସ ଗୁପ୍ତା । ସେ ହେଉଛନ୍ତି ଜଣେ ଆଇଆରଏସ ଅଧିକାରୀ । ତାଙ୍କ ଫୋନ ନମ୍ବର ହେଉଛି 8260745626 । ଉଭୟ ନିର୍ବାଚନ ପ୍ରକ୍ରିୟାର ସମୀକ୍ଷା କରୁଛନ୍ତି । ନିର୍ବାଚନ ପ୍ରକ୍ରିୟା, ସରକାରୀ ଅଧିକାରୀଙ୍କ ବ୍ୟବହାର, ଆଦର୍ଶ ଆଚରଣ ବିଧି ଉଲଂଘନ ବାବଦରେ ଯାହାର କୌଣସି ଅଭିଯୋଗ ଥିବ ସିଧାସଳଖ ସେମାନଙ୍କ ସହ ଯୋଗାଯୋଗ କରିବାକୁ ସିଇଓ ପରାମର୍ଶ ଦେଇଛନ୍ତି । ଧାମନଗରରେ ଥିବା 106 ସମ୍ବେଦନଶୀଳ ବୁଥରେ ସ୍ୱତନ୍ତ୍ର ବ୍ୟବସ୍ଥା କରାଯିବ । ଏଠାରେ ୱେବ କାଷ୍ଟିଙ୍ଗ ଛଡା ମାଇକ୍ରୋ ଅବଜର୍ଭର ନିୟୋଜିତ ହେବେ ।
ଏହାବି ପଢନ୍ତୁ- ୬୮ବର୍ଷରେ ଆଇନ ପାଠ ପଢିଲେ ବୃଦ୍ଧ, ନ୍ୟାୟ ପାଇଁ ହେଉଥିଲେ ହଟହଟା
ଏମାନଙ୍କୁ ସାଧାରଣ ପର୍ଯ୍ୟବେକ୍ଷକ ନିଜେ ନିୟୋଜିତ କରିବେ । ଶୃଙ୍ଖଳିତ ନିର୍ବାଚନକୁ ଦୃଷ୍ଟିରେ ରଖି 641 ଟି ଅନୁମତି ପ୍ରାପ୍ତ ମାରଣାସ୍ତ୍ର ବିଭିନ୍ନ ପୋଲିସ ଷ୍ଟେସନରେ ଡିପୋଜିଟ ହୋଇଛି । 1909 ଜଣ ଲୋକଙ୍କୁ 107 ଓ 116 ଧାରାରେ ଗିରଫ ହୋଇଛନ୍ତି । 172 ନନ୍ ବେଲେବୁଲ ୱାରେଣ୍ଟଙ୍କୁ ଗିରଫ କରାଯାଇଛି । 15 ଲକ୍ଷ ଟଙ୍କାର ମାଦକ ଦ୍ରବ୍ୟ ଜବତ ହୋଇଛି ।
ଇଟିଭି ଭାରତ, ଭୁବନେଶ୍ବର
