ଭଦ୍ରକ : ଚାନ୍ଦବାଲି ବ୍ଲକ ଭାଟପଡ଼ା ଗ୍ରାମ ପଞ୍ଚାୟତରେ ହୋଇଥିବା ମହାଦୁର୍ନୀତିର ତୁରନ୍ତ ପ୍ରଶାସନିକ ତଦନ୍ତ ଦାବି କରି ଦୀର୍ଘ ଦିନ ଧରି ଗଣଧାରଣାରେ ବସିଥିଲା ବିଜେପି । ପ୍ରଶାସନିକ ନୀରବତାରେ ଅତିଷ୍ଠ ହୋଇ ଶେଷରେ ଚାନ୍ଦବାଲି ତହସିଲ ପ୍ରଶାସନ ସମ୍ମୁଖରେ ଆମରଣ ଅନଶନ କରିଥିଲା । ତେବେ ସେଠାରୁ ସେମାନଙ୍କୁ ବଳପୂର୍ବକ ହଟାଇ ଦିଆଯାଇଥିବା ଅଭିଯୋଗ କରିଛି ଦଳ ।
ଅଭିଯୋଗ ହୋଇଥିବା ଦୁର୍ନୀତିର ପ୍ରଶାସନିକ ତଦନ୍ତ କରିବା ପରିବର୍ତ୍ତେ, ଧାରଣାରତ କର୍ମୀଙ୍କୁ ଚାନ୍ଦବାଲି ପୁଲିସ ପକ୍ଷରୁ ଉଦ୍ଦେଶ୍ୟମୂଳକ ଭାବେ ବଳପୂର୍ବକ ଆନ୍ଦୋଳନ ସ୍ଥାନରୁ ହଟାଇ ଦିଆଯାଇଛି ବୋଲି ଏକ ସାମ୍ବାଦିକ ସମ୍ମିଳନୀରେ ଅଭିଯୋଗ କରିଛନ୍ତି ପୂର୍ବତନ ମନ୍ତ୍ରୀ ତଥା ବିଜେପିର ବରିଷ୍ଠ ନେତା ମନମୋହନ ସାମଲ ।
ଏଥିସହ ଭାଟପଡ଼ା ଗ୍ରାମ ପଞ୍ଚାୟତରେ ହୋଇଥିବା ମହାଦୁର୍ନୀତିକୁ ଚପାଇ ଦେବାକୁ ପ୍ରଶାସନ ଓ ପୁଲିସ ପକ୍ଷରୁ ଗ୍ରହଣ କରାଯାଇଥିବା ଏତାଦୃଶ୍ୟ କାର୍ଯ୍ୟକୁ ଦଳ ପକ୍ଷରୁ ନିନ୍ଦା କରାଯାଇଛି। ତେବେ ଏନେଇ ନ୍ୟାୟିକ ତଦନ୍ତ ପାଇଁ ଦାବି କରିବା ସହ ଆଗାମୀ ଦିନରେ ଏହି ମହାଦୁର୍ନୀତିର ପର୍ଦ୍ଦାଫାସ କରିବା ପାଇଁ ଦଳ ପକ୍ଷରୁ ପ୍ରୟାସ ଜାରି ରହିବ ବୋଲି ମଧ୍ୟ କହିଛନ୍ତି ପୂର୍ବତନ ମନ୍ତ୍ରୀ ମନମୋହନ ସାମଲ ।
ଭଦ୍ରକରୁ ଦେବଶିଷ ମହାପାତ୍ର, ଇଟିଭି ଭାରତ
