ଭଦ୍ରକ: ଚର୍ଚ୍ଚାରେ ପଡିଲା ପୂର୍ଣ୍ଣଚ୍ଛେଦ । ସ୍ବାଧୀନ ପ୍ରାର୍ଥୀ ଭାବେ ଧାମନଗର ଉପନିର୍ବାଚନ ଲଢିବେ ପୂର୍ବତନ ବିଧାୟକ ରାଜେନ୍ଦ୍ର ଦାସ । ଧାମନଗର ପାଇଁ ରାଜେନ୍ଦ୍ର ସ୍ବାଧୀନ ପ୍ରାର୍ଥୀ ଭାବେ ନାମାଙ୍କନ ଦାଖଲ କରିଛନ୍ତି । କିଛି ସମୟ ପରେ ସେ ପ୍ରାର୍ଥୀପତ୍ର ଦାଖଲ କରିବେ(Rajendra Das to file nomination as independent candidate) । ବିଜେଡିରୁ ଟିକେଟ ନ ମିଳିବାରୁ ଅସନ୍ତୁଷ୍ଟ ଥିଲେ ରାଜେନ୍ଦ୍ର ଦାସ ।
ଧାମନଗର ପାଇଁ ପୂର୍ବତନ ବିଧାୟକ ରାଜେନ୍ଦ୍ର ଦାସ ବିଜେଡିରୁ ଟିକେଟ୍ ପାଇବେ ବୋଲି ଆଶା ରଖିଥିଲେ । ମାତ୍ର ବିଜେଡି ସୁପ୍ରିମ ନବୀନ ପଟ୍ଟନାୟକ ତାଙ୍କୁ ଅଣଦେଖା କରି ତିହିଡି ବ୍ଲକ ଅଧ୍ୟକ୍ଷା ଅବନ୍ତୀ ଦାସ(Abanti Das)ଙ୍କ ନାମରେ ମୋହର ମାରିଥିଲେ । ବିଜେଡିର ଟିକେଟ ଘୋଷଣା ପରେ ଖପ୍ପା ହୋଇଥିଲେ ରାଜେନ୍ଦ୍ର ଦାସଙ୍କ ସମର୍ଥକ । ଧାମନଗରରେ ଦଳୀୟ କନ୍ଦଳ ପଦାରେ ପଡିଥିଲା । ଦଳ ବିରୋଧରେ ବିଦ୍ରୋହ ଡାକରା ଦେଇଥିଲେ ଅସନ୍ତୁଷ୍ଟ ଆଶାୟୀ । ତେବେ ତାଙ୍କ ମାନଭଂଜନ ପାଇଁ ବିଜେଡିର ଉଦ୍ୟମ ବିଫଳ ହୋଇଛି । ଦଳରୁ ହତାଶ ହେବା ପରେ ସ୍ବାଧୀନ ପ୍ରାର୍ଥୀ ଭାବେ ସେ ଉପନିର୍ବାଚନ ଲଢିବେ ବୋଲି ସ୍ପଷ୍ଟ କରିଛନ୍ତି । ଆଜି ନାମାଙ୍କନପତ୍ର ଦାଖଲର ଶେଷ ଦିନ ଥିବାବେଳେ ରାଜେନ୍ଦ୍ର କିଛି ସମୟ ପରେ ନାମାଙ୍କନ ଭରିବେ ବୋଲି ସୂଚନା ମିଳିଛି ।
ଏହାମଧ୍ୟ ପଢନ୍ତୁ: Dhamnagar Bypoll: ଧାମନଗର ଉପନିର୍ବାଚନ ନେଇ ବିଜେଡିରେ ବିବାଦ !
ବିଜେପି ପକ୍ଷରୁ ଦିବଙ୍ଗତ ନେତା ତଥା ପୂର୍ବତନ ବିଧାୟକ ବିଷ୍ଣୁ ସେଠୀଙ୍କ ପୁଅ ସୂର୍ଯ୍ୟବଂଶୀ ସୂରଜଙ୍କୁ ପ୍ରାର୍ଥୀ ଭାବେ ଘୋଷଣା କରାଯାଇଛି । ସୂର୍ଯ୍ୟବଂଶୀ ମଙ୍ଗଳବାର ପ୍ରାର୍ଥୀପତ୍ର ଦାଖଲ କରିଥିଲେ । ସେପଟେ କଂଗ୍ରେସ ପକ୍ଷରୁ ବାବା ହରେକୃଷ୍ଣ ସେଠୀଙ୍କୁ ପ୍ରାର୍ଥୀ କରାଯାଇଥିବା ବେଳେ ସେ ମଧ୍ୟ ନାମାଙ୍କନ ଦାଖଲ କରିସାରିଛନ୍ତି । ବର୍ତ୍ତମାନ ହରେକୃଷ୍ଣ ରାଜୀବ ଗାନ୍ଧୀ ପଞ୍ଚାୟତରାଜ ସଂଗଠନର ଧାମନଗର ବ୍ଲକ ସଂଯୋଜକ ଭାବେ ଦାୟିତ୍ବ ତୁଲାଉଛନ୍ତି । ତେବେ ରାଜେନ୍ଦ୍ର ଦାସ ଉପନିର୍ବାଚନ ରେସ୍ରେ ସାମିଲ ହେବା ପରେ ଧାମନଗରରେ ଜୋରଦାର ଟକ୍କର ଦେଖିବାକୁ ମିଳିବ ବୋଲି ଆଲୋଚନା ହେଉଛି ।
