ଭଦ୍ରକ: କୋରୋନା କାଳରେ ନିଜ ଜୀବନକୁ ଖାତିର ନକରି ଜିଲ୍ଲାରେ ସୁଇପରମାନେ ସେବା ଯୋଗାଇ ଆସୁଥିଲେ ମଧ୍ୟ ସେମାନଙ୍କୁ ଇପିଏଫ ଓ ଇଏସଆଇ ବାବଦକୁ କିଛି ଅର୍ଥ ମିଳିନଥିବା ଅଭିଯୋଗ ଆସିଛି । ଏ ନେଇ ଜିଲ୍ଲା ପୌରପାଳିକା ସୁଇପର ସଂଘ ପକ୍ଷରୁ ପୌରପାଳିକା କର୍ତ୍ତୃପକ୍ଷ ଓ ଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ କରାଯାଇଥିବା ସୂଚନା ମିଳିଛି ।
ମହାମାରୀ ସମୟରେ ଅତି ଜରୁରୀ ନଥିଲେ ଲୋକମାନେ ଘରୁ ବାହାରୁ ନାହାନ୍ତି । କିନ୍ତୁ ଜିଲ୍ଲାର ସୁଇପରମାନେ ନିଜ କର୍ତ୍ତବ୍ୟରୁ ବିରତି ନେଇନାହାନ୍ତି । ଏହି ସମୟରେ ମଧ୍ୟ ସେବା ଯୋଗାଇ ଆସିଛନ୍ତି ସୁଇପର । କିନ୍ତୁ ସେମାନଙ୍କୁ ସେମାନଙ୍କ ଅଧିକାର ମିଳିପାରିନାହିଁ । ପୌରପାଳିକା ଅଧୀନରେ 200 କର୍ମଚାରୀ କାର୍ଯ୍ୟ କରୁଥିଲେ ମଧ୍ୟ ଦୀର୍ଘଦିନ ହେଲା ଇପିଏଫ ଓ ଇଏସଆଇ ବାବଦରେ କୌଣସି ଟଙ୍କା ପ୍ରଦାନ କରାଯାଇ ନାହିଁ କିମ୍ଭା କୌଣସି କାଗଜପତ୍ର ଦିଆଯାଇ ନାହିଁ ବୋଲି ଅଭିଯୋଗ ସେମାନେ ଅଭିଯୋଗ କରିଛନ୍ତି ।
ସୂଚନା ଅନୁଯାୟୀ, ବର୍ତ୍ତମାନ ଏକ ଠିକା ସଂସ୍ଥା କାର୍ଯ୍ୟରତ ଥିବା ବେଳେ ପୂର୍ବରୁ ହଟିଙ୍ଗ ହାଉସ ଠିକା ସଂସ୍ଥାରେ 5 ବର୍ଷ ଧରି ସୁଇପରମାନେ କାର୍ଯ୍ୟ କରିଥିଲେ । ଏତେ ବର୍ଷ କାମ କରିବା ପରେ ମଧ୍ୟ ସେମାନଙ୍କୁ ଇପିଏଫ ଓ ଇଏସଆଇ ଟଙ୍କା ପ୍ରଦାନ କରାଯାଇନାହିଁ କିମ୍ବା ଦରମା ବୃଦ୍ଧି ହୋଇନାହିଁ ।
ତେବେ ସମସ୍ତ କର୍ମଚାରୀଙ୍କ ଦରମା ବୃଦ୍ଧି ସହିତ ପୁରାତନ କର୍ମଚାରୀଙ୍କୁ ସ୍ଥାୟୀ କର୍ମଚାରୀ ଭାବେ ଜିଲ୍ଲାର ପୌରପାଳିକାରେ ନିଯୁକ୍ତି ଦେବା ଲାଗି ସୁଇପର ମହାସଂଘ ଦାବି କରିଛି । ଯଦି ଦାବିପୂରଣ ନ କରାଯାଏ ତେବେ କାର୍ଯ୍ୟବନ୍ଦ କରିବା ସହିତ ଧାରଣା ଦିଆଯିବ ବୋଲି ସଂଘ ପକ୍ଷରୁ ଚେତାବନୀ ଦିଆଯାଇଥିବା ସୂଚନା ମିଳିଛି ।
ଭଦ୍ରକରୁ ଦେବାଶିସ ମହାପାତ୍ର, ଇଟିଭି ଭାରତ
