ଭଦ୍ରକ: ବୈତରଣୀ ନଦୀରେ ଗତକାଲି ଠାରୁ ବିପଦ ସଙ୍କେତ ଉପରେ ପ୍ରବାହିତ ହେଉଛି ଜଳସ୍ତର । ରାଜ୍ୟରେ ଜାରି ରହିଥିବା ଲଘୁଚାପ ଯୋଗୁଁ ମହାନଦୀ ସମେତ ବିଭିନ୍ନ ପ୍ରମୁଖ ନଦୀ ଫୁଲୁଥିବାବେଳେ ବୈତରଣୀ ଓ ଶାଳନ୍ଦୀ ନଦୀରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଭଦ୍ରକର ଆଖୁଆପଦା ଠାରେ ବିପଦ ସଙ୍କେତ ୧୭.୮୩ ଫୁଟ ଥିବାବେଳେ, ସକାଳ ୫ ରୁ ୧୭.୯୬ରେ ବନ୍ୟା ଜଳ ପ୍ରବାହିତ ହେଉଛି । ତେବେ ବର୍ତ୍ତମାନ ସୁଦ୍ଧା ନଦୀର ବନ୍ୟାଜଳ ଏସକେପ କିମ୍ବା ମାହାରା ଦେଇ ବାହାରକୁ ବାହାରି ନାହିଁ ।
ସେହିପରି ଭଦ୍ରକ ସହର ଦେଇ ପ୍ରବାହିତ ଶାଳନ୍ଦୀ ନଦୀର ଜଳସ୍ତର ଗତ ୪ ଦିନ ହେବ ବଢ଼ିବାରେ ଲାଗିଛି । ଏହି ନଦୀର ଉପର ମୁଣ୍ଡରେ ଥିବା ହଦଗଡ଼ ଡ୍ୟାମରୁ ମୋଟ ୩ଟି ଗେଟ୍ ଯୋଗେଁ ୨୪୦୦ କ୍ୟୁସେକ ଜଳ ଶାଳନ୍ଦୀ ନଦୀକୁ ଛଡାଯାଇଛି । ରାଜଘାଟ ଠାରେ ଏହି ନଦୀର ବିପଦ ସଙ୍କେତ ୧୭.୦୨ ଫୁଟ ଥିବାବେଳେ ବର୍ତ୍ତମାନ ପ୍ରାୟ ୧୫ ଫୁଟ ଉପରେ ବନ୍ୟା ଜଳ ପ୍ରବାହିତ ହେଉଛି ।
ତେବେ ହଦଗଡ଼ରୁ ଯେଉଁ ୨୪୦୦ କ୍ୟୁସେକ ଜଳ ଛଡାଯାଇଛି, ତାହା ତଳିଆ ଅଞ୍ଚଳରେ ବନ୍ୟା ପରିସ୍ଥିତି ସୃଷ୍ଟି କରିପାରେ ବୋଲି ଅନୁମାନ କରାଯାଉଛି । ଶାଳନ୍ଦୀରେ ବନ୍ୟାଜଳ ବୃଦ୍ଧି ପାଇବା ଯୋଗୁଁ, ଶାଖା ନାଳିଆ ନଦୀରେ ବନ୍ୟା ପରିସ୍ଥିତି ଦେଖା ଦେଇଛି । ଭଦ୍ରକ ବ୍ଲକର ଅର୍ଣ୍ଣପାଳ ଓ ବିଷ୍ଣୁପୁର ବିନ୍ଧା ପଞ୍ଚାୟତର ଅଧିକାଂଶ ଗ୍ରାମରେ ପାଣି ପଶିବା ସହ ଚାଷ ଜମି ଜଳମଗ୍ନ ହେବାରେ ଲାଗିଛି । ସେହିପରି ତିହିଡି ବ୍ଲକର ତଳିଆ ଅଞ୍ଚଳରେ ବନ୍ୟା ପରିସ୍ଥିତି ସୃଷ୍ଟି ହେବା ନେଇ ଆଶଙ୍କା ଦେଖାଦେଇଛି ।
ଇଟିଭି ଭାରତ, ଭଦ୍ରକ
