ଭଦ୍ରକ: ଜିଲ୍ଲା ଆରଡି ଫାଣ୍ଡି ପକ୍ଷରୁ ମାକ୍ସ ଚେକିଂ ଆଳରେ ଯୁବକଙ୍କୁ ବାଡେଇବା ପୋଲିସକୁ ମହଙ୍ଗା ପଡିଛି । ଆଜି ଜିଲ୍ଲା ପୋଲିସ କାର୍ଯ୍ଯାଳୟ ପକ୍ଷରୁ ଆରଡି ଫାଣ୍ଡିର ଏଏସଆଇ ପ୍ରଦୀପ ନାୟକ ଓ ହାବିଲଦାର ରମେଶ ମଲିକଙ୍କୁ ଜିଲ୍ଲା ହେଡକ୍ବାଟରକୁ ବଦଳି କରାଯାଇଛି ।
ସୂଚନା ଅନୁସାରେ, ବେତାଳିଗାଁରେ ରହୁଥିବା ପ୍ରଦୀପ ମେକାପଙ୍କ ଦୁଇ ପୁଅ ସୌମ୍ୟରଞ୍ଜନ ଓ ପ୍ରଭୁରଞ୍ଜନ ସକାଳୁ ଆଖଣ୍ଡଳମଣିଙ୍କ ଦର୍ଶନ ପାଇଁ ଆସୁଥିବା ବେଳେ ମାକ୍ସ ପିନ୍ଧିନଥିବାରୁ ଉଭୟଙ୍କୁ ପୋଲିସ ଅଟକାଇଥିଲା । ଫାଇନ ଆଦାୟକୁ ନେଇ ପୋଲିସ ଓ ଯୁବକଙ୍କ ମଧ୍ଯରେ ଯୁକ୍ତିତର୍କ ହେଉଥିବା ସମୟରେ ଯୁବକ ଜଣକ ମୋବାଇଲରେ ଭିଡିଓ ଉତ୍ତୋଳନ କରିବାକୁ ଚେଷ୍ଟା କରିଥିଲେ । ଏହି ସମୟରେ ହଠାତ ତିନି ଚାରିଜଣ ପୋଲିସ ଯୁବକଙ୍କୁ ତଳେ ଘୋଷାଡି ମାଡ ମାରିଥିଲେ । ଏହା ସହିତ ତାଙ୍କୁ ଓଲଟା ପୋଲିସଙ୍କୁ ମାଡ ମାରିବା ଦଫାରେ ମାମଲା ରୁଜୁ କରିଥିଲା । ଏପରିକି ହତ୍ଯା ମାମଲା ଭଳି 11 ଟି ସଙ୍ଗୀନ ଦଫାରେ ପୋଲିସ କୋର୍ଟ ଚାଲାଣ କରିଥିଲା ।
ହେଲେ ଘଟଣାର ସତ୍ୟ ଭିଡିଓ ଭାଇରାଲ ହେବା ପରେ ପୋଲିସର ମିଛ ଘଟଣା ପଦାକୁ ଆସିଥିଲା । ଏପରିକି ଘଟଣା ବିଭିନ୍ନ ଗଣମାଧ୍ଯମରେ ପରିବେଷଣ ହେବାପରେ ଏଏସପିଙ୍କ ନିର୍ଦ୍ଦେଶକ୍ରମେ ସୋମବାର ଧାମନଗର ଏସଡିପିଓ ଘଟଣାର ତଦନ୍ତ ଆରମ୍ଭ କରି ରିପୋର୍ଟ ଦେବା ପରେ ଆଜି ମଧ୍ଯାହ୍ନରେ ଜିଲ୍ଲା ପୋଲିସ କାର୍ଯ୍ୟାଳୟ ପକ୍ଷରୁ ଫାଣ୍ଡିର ଏଏସଆଇ ପ୍ରଦୀପ ନାୟକ ଓ ହାବିଲିଦାର ରମେଶ ମଲିକଙ୍କୁ ଜିଲ୍ଲା ହେଡକ୍ବାଟରକୁ ବଦଳି କରାଯାଇଛି । ଏହି ବଦଳି ନେଇ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳି ପାରିନାହିଁ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
