ଭଦ୍ରକ: ଜିଲ୍ଲାରେ ଚୋରା ମଦ ବେପାରୀଙ୍କ ଉପରେ କଡା କାର୍ଯ୍ୟାନୁଷ୍ଠାନ । ଭଦ୍ରକ ତିହିଡି ପୋଲିସ ଏବଂ ଅବକାରୀ ବିଭାଗ ପକ୍ଷରୁ ଶନିବାର ବିଭିନ୍ନ ମଦ କାରବାର ସ୍ଥାନରେ ଚଢାଉ କରାଯାଇଛି । ମୋଟ 5 ଜଣ ଗିରଫ ହୋଇଥିବାବେଳେ ଘଟଣାସ୍ଥଳରୁ ବିପୁଳ ପରିମାଣର ମଦ ଜବତ କରାଯାଇଥିବା ସୂଚନା ମିଳିଛି ।
ସୂଚନାଯୋଗ୍ୟ, ତିହିଡି ପୋଲିସ ପକ୍ଷରୁ ତିହିଡି ଥାନା ଅନ୍ତର୍ଗତ ଅଲ୍ଲୀନଗର ଓ ସଦର ବଜାରସ୍ଥିତ ହାଟପଟିରେ ଚଢାଉ କରାଯାଇ 2 ଜଣ ମଦ ବେପାରୀଙ୍କୁ ଗିରଫ କରାଯାଇଛି । ସେପଟେ ଅବକାରୀ ବିଭାଗ ପକ୍ଷରୁ ମଧ୍ୟ ଏକ ସ୍ବତନ୍ତ୍ର ଟିମ୍ ଦ୍ବାରା ବିଭିନ୍ନ ଅଞ୍ଚଳରେ ଚଢାଉ କରାଯାଇ ବିପୁଳ ପରିମାଣର ଦେଶୀ ରନ୍ଧା ମଦ ଓ ଏକ ବାଇକ ଜବତ କରାଯିବା ସହ 3 ଜଣଙ୍କୁ ଗିରଫ କରାଯାଇଛି । ଅଭିଯୁକ୍ତମାନେ ହେଲେ ହାଟୁଆରୀ ଗ୍ରାମର ମାଧବାନନ୍ଦ ମଳିକ, ଭାଟପଡା ଗାଁର ଶ୍ରୀକୁମାର ଦାସ ଓ ବଉଳପାଳ ଗ୍ରାମର ସୁରେନ୍ଦ୍ର ଦାସ ।
ଅଭିଯୁକ୍ତ ମାଧବାନନ୍ଦ ନିକଟରୁ ଏକ ବାଇକ ଓ 100 ଲିଟର ଦେଶୀ ରନ୍ଧା ମଦ ଏବଂ ଭାଟପଡ଼ା ଓ ବଉଳପାଳ ଗ୍ରାମରେ ଚଢ଼ାଉ କରାଯାଇ 50 ଲିଟର ଦେଶୀ ମଦ ଜବତ କରାଯାଇଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
